കരാക്കസ്: ഇരട്ട ഭൂചലനത്തെത്തുടർന്ന് തകർന്നടിഞ്ഞ വെനസ്വേലയിൽ അതിജീവനത്തിന്റെ അത്ഭുതക്കാഴ്ച. ദുരന്തബാധിതമായ ലാ ഗ്വാരിയ സംസ്ഥാനത്ത് കെട്ടിടാവശിഷ്ടങ്ങൾക്കിടയിൽ 106 മണിക്കൂറോളം കുടുങ്ങിക്കിടന്ന ഇരുപത്തിയൊന്നുകാരനെ രക്ഷാപ്രവർത്തകർ അത്ഭുതകരമായി ജീവനോടെ പുറത്തെടുത്തു. ഇക്കാര്യം ഡെൽസി റോഡ്രിഗസ് സ്ഥിരീകരിച്ചു. രക്ഷാപ്രവർത്തനം അതീവ നിർണായകമായ ഘട്ടത്തിലൂടെയാണ് കടന്നുപോകുന്നതെന്ന് ദേശീയ അസംബ്ലി പ്രസിഡന്റ് ജോർജ് റോഡ്രിഗസ് അറിയിച്ചു.
അതേസമയം, വെനസ്വേലയിൽ വീണ്ടും ശക്തമായ തുടർചലനങ്ങൾ അനുഭവപ്പെട്ടതായി യു.എസ്. ജിയോളജിക്കൽ സർവേ വ്യക്തമാക്കി. തലസ്ഥാനമായ കരാക്കസിന്റെ വടക്കൻ മേഖലയിലാണ് പുതിയ ഭൂചലനം രേഖപ്പെടുത്തിയത്. ഏറ്റവും പുതിയ കണക്കുകൾ പ്രകാരം ഭൂചലനത്തിൽ മരണപ്പെട്ടവരുടെ എണ്ണം 1,450 കടന്നു. മരണസംഖ്യ ഇനിയും ഉയരാൻ സാധ്യതയുണ്ടെന്നും നിരവധി പേരെ ഇനിയും കണ്ടെത്താനുണ്ടെന്നുമാണ് ഔദ്യോഗിക വിലയിരുത്തൽ. ആശുപത്രികളിൽ കാണാതായവരുടെ ചിത്രങ്ങൾ പതിച്ച് പ്രിയപ്പെട്ടവർക്കായി കാത്തിരിക്കുന്നവരുടെ നീണ്ട നിരയാണുള്ളത്. നിർണായകമായ 96 മണിക്കൂർ പിന്നിട്ടെങ്കിലും അത്ഭുതകരമായ രക്ഷപ്പെടുത്തലുകൾ ഇനിയും ഉണ്ടാകുമെന്ന പ്രതീക്ഷയിലാണ് രക്ഷാപ്രവർത്തകർ.
ഇതിനിടെ, ഇന്ത്യയുടെ ‘ഓപ്പറേഷൻ അമിസ്താദ്’ ദൗത്യത്തിന്റെ ഭാഗമായി വെനസ്വേലയിൽ സ്ഥാപിച്ച ഫീൽഡ് ആശുപത്രി പ്രവർത്തനം ആരംഭിച്ചു. കരാക്കസിലെ ഇന്റർനാഷണൽ ലാ റിൻകൊനാഡ റേസ്ട്രാക്ക് ക്യാമ്പിൽ വിദഗ്ധ ഡോക്ടർമാർ ഉൾപ്പെടെയുള്ള സംഘം ദുരന്തബാധിതർക്ക് 24 മണിക്കൂറും സൗജന്യ ചികിത്സ ലഭ്യമാക്കുന്നുണ്ടെന്ന് വെനസ്വേലയിലെ ഇന്ത്യൻ എംബസി അറിയിച്ചു. ജൂൺ 24-നുണ്ടായ ഇരട്ട ഭൂചലനത്തിൽ ലക്ഷക്കണക്കിന് ആളുകളാണ് ദുരിതത്തിലായത്. വൻ നാശനഷ്ടങ്ങൾ സംഭവിച്ച മേഖലകളിൽ യുദ്ധകാലാടിസ്ഥാനത്തിൽ രക്ഷാപ്രവർത്തനവും ദുരിതാശ്വാസ പ്രവർത്തനങ്ങളും തുടരുകയാണ്.
