ന്യൂഡൽഹി: രാജ്യത്തിന്റെ 80-ാം സ്വാതന്ത്ര്യദിനാഘോഷങ്ങൾക്ക് ഡൽഹിയിലെ ചരിത്രപ്രസിദ്ധമായ ചെങ്കോട്ട സാക്ഷ്യം വഹിക്കുമ്പോൾ പുതിയൊരു ചരിത്രനിമിഷത്തിന് കൂടി വേദിയൊരുങ്ങുന്നു. സ്വാതന്ത്ര്യദിനത്തിലെ ഔദ്യോഗിക ചടങ്ങുകളുടെ ഭാഗമായി ദേശീയ ഗീതമായ ‘വന്ദേമാതരം’ ആദ്യമായി ചെങ്കോട്ടയിൽ ആലപിക്കും. പ്രധാനമന്ത്രി നരേന്ദ്ര മോദിയുടെ അഭിസംബോധനയ്ക്ക് ശേഷം, ദേശീയഗാനമായ ‘ജനഗണമന’യ്ക്ക് തൊട്ടുമുമ്പായിട്ടായിരിക്കും വന്ദേമാതരം ആലപിക്കുകയെന്ന് പ്രതിരോധ മന്ത്രാലയം അറിയിച്ചു. പ്രധാനമന്ത്രി ചെങ്കോട്ടയിലെത്തിച്ചേരുന്ന ഉടൻ തന്നെ ഇത് ആലപിക്കും. ഈ സമയത്ത് സദസ്സിലുള്ളവർ ആദരസൂചകമായി എഴുന്നേറ്റുനിൽക്കും. തുടർന്ന് ദേശീയപതാക ഉയർത്തുകയും ദേശീയഗാനം ആലപിക്കുകയും ചെയ്യുന്നതോടെ ഔദ്യോഗിക നടപടിക്രമങ്ങൾ പൂർത്തിയാകും.
‘യുവശക്തി’ എന്ന പ്രമേയത്തിലൂന്നിയാണ് ഇത്തവണത്തെ സ്വാതന്ത്ര്യദിനാഘോഷങ്ങൾ സംഘടിപ്പിച്ചിരിക്കുന്നത്. രാജ്യത്തെ വിദ്യാർത്ഥികളുടെയും യുവജനങ്ങളുടെയും നേട്ടങ്ങൾക്കും സംഭാവനകൾക്കും ആഘോഷങ്ങളിൽ പ്രത്യേക പ്രാധാന്യം നൽകും. ബഹിരാകാശ സാങ്കേതികവിദ്യ, ബഹിരാകാശ മാലിന്യ സംസ്കരണം തുടങ്ങിയ അത്യാധുനിക മേഖലകളിൽ ശ്രദ്ധേയമായ സംഭാവനകൾ നൽകിയ യുവ ഇന്ത്യൻ സംരംഭകരുടെയും എഞ്ചിനീയർമാരുടെയും നേട്ടങ്ങൾ ചടങ്ങിൽ പ്രദർശിപ്പിക്കും. പ്രതിപക്ഷ നേതാവ് രാഹുൽ ഗാന്ധിയടക്കമുള്ള പ്രമുഖർക്കും ആഘോഷത്തിലേക്ക് ക്ഷണമുണ്ട്. കേന്ദ്രമന്ത്രിമാർ, ഉന്നത സൈനിക ഉദ്യോഗസ്ഥർ, നയതന്ത്രജ്ഞർ തുടങ്ങി നിരവധി വിശിഷ്ടാതിഥികൾ ചെങ്കോട്ടയിലെ ചടങ്ങിൽ പങ്കെടുക്കും.
വന്ദേമാതരത്തിന് ദേശീയഗാനത്തിന് സമാനമായ നിയമപരിരക്ഷയും ആദരവും ഉറപ്പാക്കുന്ന ‘Prevention of Insults to National Honour (Amendment) Bill, 2026’ പാർലമെന്റ് നേരത്തെ പാസാക്കിയിരുന്നു. രാഷ്ട്രപതിയുടെ അംഗീകാരം ലഭിച്ചതോടെ ഈ നിയമം പ്രാബല്യത്തിലായി. വന്ദേമാതരത്തെ അനാദരിക്കുന്നതോ അതിന്റെ ആലാപനം തടസ്സപ്പെടുത്തുന്നതോ മൂന്ന് വർഷം വരെ തടവ് ലഭിക്കാവുന്ന ക്രിമിനൽ കുറ്റമായി ഇതിലൂടെ മാറി. ദേശീയപതാക, ഭരണഘടന, ദേശീയഗാനം എന്നിവയ്ക്ക് ലഭിക്കുന്ന നിയമപരിരക്ഷയ്ക്ക് സമാനമായ സംരക്ഷണം ഇനി ദേശീയഗീതമായ വന്ദേമാതരത്തിനും ലഭിക്കും. ഇത്തവണത്തെ സ്വാതന്ത്ര്യദിനാഘോഷങ്ങൾ രാജ്യത്തിന്റെ ദേശീയബോധവും യുവശക്തിയും ഒരുമിച്ച് ഉയർത്തിക്കാട്ടുന്ന സവിശേഷമായ വേദിയായി മാറും.
