ലഖ്നൗ: ഉത്തര്പ്രദേശിലെ ലഖ്നൗ അലിഗഞ്ച് മേഖലയിലെ വാണിജ്യ സമുച്ചയത്തിന്റെ മുകളിലത്തെ നിലയില് പ്രവര്ത്തിച്ചിരുന്ന കോച്ചിംഗ് സെന്ററില് വന് തീപിടിത്തം. സ്ഥാപനത്തില് നിന്ന് തീയും പുകയും അതിവേഗം പടര്ന്നതോടെ വിദ്യാര്ഥികളും നാട്ടുകാരും പരിഭ്രാന്തിയിലായി. കെട്ടിടത്തില് നിന്ന് താഴേക്ക് ചാടിയ ഏതാനും വിദ്യാര്ഥികള്ക്ക് പരിക്കേറ്റതായാണ് റിപ്പോര്ട്ടുകള്. പ്രാഥമിക വിവരങ്ങള് പ്രകാരം കെട്ടിടത്തിലെ എയര് കണ്ടീഷനിംഗ് സംവിധാനത്തിലുണ്ടായ ഷോര്ട്ട് സര്ക്യൂട്ടാണ് അപകടത്തിന് കാരണമായതെന്ന് സംശയിക്കുന്നു.
തീ ആളിപ്പടര്ന്നതോടെ പരിസരമാകെ ആശങ്ക നിറഞ്ഞ സാഹചര്യമായി. വിവരമറിഞ്ഞ് അഗ്നിരക്ഷാസേനയുടെ നിരവധി യൂണിറ്റുകള് സ്ഥലത്തെത്തി രക്ഷാപ്രവര്ത്തനം ആരംഭിച്ചു. കെട്ടിടത്തിനുള്ളില് കുടുങ്ങിക്കിടക്കുന്നവരെ സുരക്ഷിതമായി പുറത്തെടുക്കാനും തീ നിയന്ത്രണവിധേയമാക്കാനും ഉദ്യോഗസ്ഥര് ശ്രമം തുടരുകയാണ്. തീപിടിത്തത്തിന്റെ തീവ്രത രക്ഷാപ്രവര്ത്തനത്തെ സാരമായി ബാധിച്ചിട്ടുണ്ടെന്ന് അഗ്നിരക്ഷാസേന അറിയിച്ചു.
പ്രാഥമിക കണക്കുകള് പ്രകാരം 10 മുതല് 12 പേര് വരെ കെട്ടിടത്തിനുള്ളില് കുടുങ്ങിക്കിടക്കുന്നതായാണ് വിവരം. സംഭവത്തില് യോഗി ആദിത്യനാഥ് ഇടപെടുകയും രക്ഷാപ്രവര്ത്തനം വേഗത്തിലാക്കാനും പരിക്കേറ്റവര്ക്ക് മികച്ച ചികിത്സ ഉറപ്പാക്കാനും ഉദ്യോഗസ്ഥര്ക്ക് അടിയന്തര നിര്ദേശം നല്കുകയും ചെയ്തു. വാണിജ്യ കെട്ടിടങ്ങളില് പ്രവര്ത്തിക്കുന്ന വിദ്യാഭ്യാസ സ്ഥാപനങ്ങളിലെ അഗ്നിസുരക്ഷാ സംവിധാനങ്ങളുടെ അപര്യാപ്തത വീണ്ടും ചര്ച്ചയാവുകയാണ്. ഫയര് എക്സിറ്റുകള്, അടിയന്തര ഒഴിപ്പിക്കല് പദ്ധതികള്, ഫയര് അലാറങ്ങള് എന്നിവയുടെ കാര്യക്ഷമത ഉറപ്പാക്കേണ്ടതിന്റെ ആവശ്യകത വിദഗ്ധര് ചൂണ്ടിക്കാട്ടുന്നു. സംഭവത്തെത്തുടര്ന്ന് സുരക്ഷാ മാനദണ്ഡങ്ങള് കര്ശനമായി പരിശോധിക്കാനാണ് അധികൃതരുടെ തീരുമാനം.
