ഡൽഹി: വോഡഫോൺ ഐഡിയ (Vi) കമ്പനിയുടെ നോൺ എക്സിക്യൂട്ടീവ് ചെയർമാനായി കുമാർ മംഗളം ബിർളയെ നിയമിച്ചു. കടബാധ്യതകൾ കുറയ്ക്കുന്നത് അടക്കമുള്ള നടപടികൾ കമ്പനി പ്രഖ്യാപിച്ചതോടെ ബുധനാഴ്ച Vi ഓഹരി വില 4.62% ഉയർന്ന് 11.30 രൂപയിലെത്തി. ഈ നിയമനം മെയ് 5 മുതലാണ് പ്രാബല്യത്തിൽ വന്നത്. നിലവിൽ കമ്പനിയുടെ നോൺ എക്സിക്യൂട്ടീവ് ഡയറക്ടറായിരുന്ന ബിർളയെ ബോർഡിനെ നയിക്കുന്ന ചെയർമാൻ പദവിയിലേക്കാണ് ഉയർത്തിയത്. രവീന്ദർ താക്കറിന് പകരമാണ് ഈ നിയമനം, അദ്ദേഹം ഇനി കമ്പനിയുടെ നോൺ-എക്സിക്യൂട്ടീവ് വൈസ് ചെയർമാനായി തുടരും.
മാനേജ്മെന്റ് ഘടനയിലെ മാറ്റത്തോടൊപ്പം അഡ്ജസ്റ്റഡ് ഗ്രോസ് റവന്യൂ (AGR) സംബന്ധമായ ബാധ്യതകളിൽ വലിയ തോതിൽ കുറവുണ്ടായതായും കമ്പനി അറിയിച്ചു. കേന്ദ്ര സർക്കാർ കമ്പനിയുടെ AGR ബാധ്യത ഏകദേശം 27% കുറച്ചിട്ടുണ്ട്. മുൻപ് 87,695 കോടി രൂപയുടെ AGR ബാധ്യത 2025 ഡിസംബർ 31 വരെ മാറ്റിവെച്ചിരുന്നു. പുതുക്കിയ ബാധ്യതകൾ രണ്ട് ഘട്ടങ്ങളിലായി 10 വർഷങ്ങൾ കൊണ്ട് തിരിച്ചടയ്ക്കാനാണ് തീരുമാനം. ഇതിൽ 2032 മുതൽ 2035 വരെ വർഷം തോറും കുറഞ്ഞത് 100 കോടി രൂപ വീതവും, ബാക്കി തുക 2036 മുതൽ 2041 വരെയുള്ള വർഷങ്ങളിൽ 6 ഇൻസ്റ്റാൾമെന്റുകളായും അടയ്ക്കണം.
ക്യാഷ് ഫ്ലോ വികസനം, 5G ശൃംഖലയുടെ വ്യാപനം എന്നിവയ്ക്കായി കമ്പനി ശ്രമിക്കുന്ന സാഹചര്യത്തിൽ ഈ നീക്കങ്ങൾ വലിയ ആശ്വാസമാകുമെന്ന് വിലയിരുത്തപ്പെടുന്നു. ടെലികോം വിപണിയിലെ തീവ്രമായ മത്സരങ്ങൾക്കിടയിൽ നെറ്റ് വർക്ക് വികസനത്തിനും മൂലധന സമാഹരണത്തിനുമായി കമ്പനി ശ്രമിക്കുമ്പോഴാണ് നേതൃസ്ഥാനങ്ങളിൽ ഈ മാറ്റങ്ങൾ വരുന്നത്. കമ്പനിയുടെ ഭാവി തന്ത്രങ്ങൾക്കും നിക്ഷേപകരുടെ ആത്മവിശ്വാസം വർദ്ധിപ്പിക്കാനും ഈ മാറ്റങ്ങൾ പ്രധാനമാണെന്ന് കരുതപ്പെടുന്നു. മെയ് 5 മുതൽ പ്രാബല്യത്തിൽ വന്ന ഈ നിയമനം സെബിയുടെ റഗുലേഷൻസ് 30 പ്രകാരമാണ് നടപ്പിലാക്കിയിരിക്കുന്നത്
