ന്യൂഡൽഹി: വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജിവെച്ചതിന് പിന്നാലെ സിജെപി ആഹ്ളാദപ്രകടനം നടത്തി. ജനാധിപത്യം വിജയിച്ചെന്നും പാറ്റകളോട് കളിക്കരുതെന്നും രാജി വാർത്ത സ്ഥിരീകരിച്ചുകൊണ്ട് സിജെപി നേതാവ് അഭിജിത് ദീപ്കെ പ്രതികരിച്ചു. സമാധാനപരമായ പോരാട്ടം ഫലം കാണുമെന്ന വിശ്വാസമാണ് ഒടുവിൽ വിജയം കണ്ടതെന്ന് വ്യക്തമാക്കിയ ദീപ്കെ, ഭരണകൂടത്തിന് മുന്നിൽ തലകുനിക്കാതെ പോരാടിയാൽ ജനാധിപത്യത്തിൽ ഏത് ലക്ഷ്യവും നേടാനാകുമെന്ന് ഓർമ്മിപ്പിച്ചു.
രാജിക്ക് പിന്നാലെ സർക്കാർ അടിയന്തരമായി നടപ്പാക്കേണ്ട ആവശ്യങ്ങളും ദീപ്കെ മുന്നോട്ടുവെച്ചു. ആത്മഹത്യ ചെയ്ത വിദ്യാർത്ഥികളുടെ കുടുംബങ്ങൾക്ക് ഒരു കോടി രൂപ വീതം നഷ്ടപരിഹാരം നൽകണം. കൂടാതെ, ജൂലൈ 20-ന് ജന്തർ മന്തറിൽ നടന്ന ‘ചലോ സൻസദ്’ മാർച്ചിനിടെ വിദ്യാർത്ഥികൾക്ക് നേരെ അതിക്രമം അഴിച്ചുവിട്ട പോലീസ് ഉദ്യോഗസ്ഥർക്കെതിരെ കർശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു. പ്രസംഗത്തിനിടെ വികാരാധീനനായ ദീപ്കെ, ആത്മഹത്യ ചെയ്ത വിദ്യാർത്ഥികളുടെ പേരുകൾ വിളിച്ചുപറയുകയും അവരുടെ ഓർമ്മയ്ക്കായി രണ്ട് മിനിറ്റ് മൗനം ആചരിക്കുകയും ചെയ്തു.
മറ്റൊരു വഴിയുമില്ലാത്ത സാഹചര്യത്തിലാണ് ഉച്ചയോടെ ധർമ്മേന്ദ്ര പ്രധാൻ രാജിയിലേക്ക് നീങ്ങിയത്. സിജെപി പ്രതിനിധികളുമായി കേന്ദ്രസർക്കാർ നടത്തിയ ചർച്ചയിൽ വിദ്യാഭ്യാസ മന്ത്രിയുടെ രാജി, പ്രതിഷേധിച്ച വിദ്യാർത്ഥികൾക്കെതിരെയുള്ള കേസുകൾ പിൻവലിക്കൽ, നഷ്ടപരിഹാരം എന്നീ മൂന്ന് ആവശ്യങ്ങളാണ് പ്രധാനമായും ഉന്നയിച്ചിരുന്നത്. ആദ്യഘട്ടത്തിൽ രാജി ഒഴികെയുള്ള കാര്യങ്ങളിൽ ധാരണയിലെത്താനാണ് സർക്കാർ ശ്രമിച്ചതെങ്കിലും, പ്രധാൻ രാജിവെക്കാതെ പിന്നോട്ടില്ലെന്ന നിലപാടിൽ സമരക്കാർ ഉറച്ചുനിന്നു. ഇതോടെ സർക്കാരിന് സമരക്കാരുടെ ആവശ്യത്തിന് മുന്നിൽ വഴങ്ങേണ്ടി വരികയായിരുന്നു.
