മുംബൈ: ഇന്ത്യയിലെ ഏറ്റവും വലിയ ഐപിഒ ആയി മാറാൻ സാധ്യതയുള്ള ജിയോയുടെ പ്രഖ്യാപനത്തിന് പിന്നാലെ ഓഹരി വിപണിയിൽ റിലയൻസ് ഇൻഡസ്ട്രീസ് മികച്ച മുന്നേറ്റം കാഴ്ചവെക്കുന്നു. കമ്പനിയുടെ ഓഹരികൾ മൂന്ന് ശതമാനം വരെ നേട്ടമാണ് രേഖപ്പെടുത്തിയത്. ഈ പബ്ലിക് ഇഷ്യു പൂർണ്ണമായും പുതിയ ഓഹരികൾ ഇറക്കിക്കൊണ്ടുള്ളതായിരിക്കും. ഇതിൽ ഓഫർ ഫോർ സെയിൽ ഘടകം ഉൾപ്പെടുത്തിയിട്ടില്ല എന്നത് ശ്രദ്ധേയമാണ്. ആർട്ടിഫിഷ്യൽ ഇന്റലിജൻസ് (എഐ), ന്യൂ എനർജി, റീട്ടെയിൽ വികസനം എന്നീ മേഖലകളിൽ വൻ നിക്ഷേപത്തിനാണ് റിലയൻസ് തയ്യാറെടുക്കുന്നത്. ഈ നീക്കങ്ങൾ കമ്പനിയുടെ വിപണി മൂല്യത്തെ കൂടുതൽ ഉയർത്തുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
കമ്പനിയുടെ 49-ാമത് വാർഷിക പൊതുയോഗത്തിൽ ജിയോ ഐപിഒ ഈ വർഷം അവസാനത്തോടെ ഉണ്ടാകുമെന്ന സൂചനകളാണ് പുറത്തുവന്നത്. അടുത്ത അഞ്ച് വർഷത്തിനുള്ളിൽ നികുതിക്ക് മുമ്പുള്ള വരുമാനം ഇരട്ടിയിലധികം വർദ്ധിപ്പിക്കാനുള്ള വിപുലമായ പദ്ധതികളും റിലയൻസ് പ്രഖ്യാപിച്ചിട്ടുണ്ട്. നിലവിൽ 1,337 രൂപയിൽ വ്യാപാരം നടക്കുന്ന ഓഹരിക്ക് 1,765 രൂപ ടാർഗറ്റ് നൽകിക്കൊണ്ട് പ്രമുഖ ബ്രോക്കറേജ് സ്ഥാപനങ്ങൾ ‘ബൈ’ റേറ്റിംഗ് നൽകി. ഊർജ്ജ മേഖലയിൽ വലിയ മാറ്റങ്ങൾ ലക്ഷ്യമിടുന്ന കമ്പനി, സോളാർ സെല്ലുകളും മൊഡ്യൂളുകളും ഇതിനകം കമ്മീഷൻ ചെയ്തുകഴിഞ്ഞു. കൂടാതെ, 40 ജിഗാവാട്ട് ബാറ്ററിയുടെയും ഫാക്ടറിയുടെയും ആദ്യ ഘട്ടം ഈ വർഷം പ്രവർത്തനസജ്ജമാകും. 2027 സാമ്പത്തിക വർഷത്തോടെ ന്യൂ എനർജി വിഭാഗം ലാഭകരമായ വരുമാനം നൽകിത്തുടങ്ങുമെന്നാണ് പ്രതീക്ഷിക്കുന്നത്.
അതേസമയം, ജാംനഗറിൽ വമ്പൻ എഐ ഹബ്ബ് സ്ഥാപിക്കാനുള്ള തയ്യാറെടുപ്പിലാണ് റിലയൻസ്. 2026 സാമ്പത്തിക വർഷത്തിന്റെ അവസാനത്തോടെ നിർണ്ണായക മുന്നേറ്റം കമ്പനി ലക്ഷ്യമിടുന്നുണ്ടെങ്കിലും, ബഹുഭാഷാ എഐ സേവനങ്ങൾ സംബന്ധിച്ച റിലയൻസിന്റെ പ്രോജക്റ്റുകളിൽ കൂടുതൽ വ്യക്തത വരാനുണ്ടെന്ന അഭിപ്രായങ്ങളും ഉയരുന്നുണ്ട്. ഏതായാലും ആഗോള തലത്തിൽ തന്നെ ഏറെ ശ്രദ്ധയാകർഷിക്കുന്ന ജിയോ ഐപിഒ നടപടികൾ റിലയൻസ് ഓഹരികൾക്ക് കൂടുതൽ കരുത്ത് പകരുമെന്ന കാര്യത്തിൽ സംശയമില്ല. വിപണിയിലെ വൻകിട നിക്ഷേപകരും ഈ മാറ്റങ്ങളെ അതീവ ശ്രദ്ധയോടെയാണ് നിരീക്ഷിക്കുന്നത്.
