ന്യൂഡൽഹി: ആകാശയാത്രയ്ക്കിടെ വനിതാ യാത്രക്കാരിക്ക് മരത്തിൽ നിന്ന് ഇലകൾ പറിച്ച് സമ്മാനിച്ച പാരാഗ്ലൈഡിങ് പൈലറ്റിന്റെ വീഡിയോ സമൂഹമാധ്യമങ്ങളിൽ വലിയ ചർച്ചയാകുന്നു. ഹരിതാഭമായ മലനിരകൾക്ക് മുകളിലൂടെ പറക്കുന്നതിനിടെ, പാരാഗ്ലൈഡർ മരച്ചില്ലകൾക്ക് സമീപത്തേക്ക് നിയന്ത്രിച്ച് എത്തിച്ച് പൈലറ്റ് ഇലകൾ പറിച്ചെടുക്കുകയായിരുന്നു. പൂക്കൾ ലഭിക്കാത്തതുകൊണ്ടാണ് ഇലകൾ സമ്മാനിക്കുന്നതെന്ന തരത്തിലുള്ള പരാമർശവും പൈലറ്റ് നടത്തുന്നതായി ദൃശ്യങ്ങളിൽ വ്യക്തമാണ്.
യാത്രക്കാരിയെ സന്തോഷിപ്പിക്കാനായി നടത്തിയ സൗഹൃദപരമായ ശ്രമമായാണ് പലരും ഇതിനെ വിലയിരുത്തുന്നത്. എന്നാൽ, വീഡിയോ സമൂഹമാധ്യമങ്ങളിൽ പ്രചരിച്ചതോടെ സമ്മിശ്ര പ്രതികരണങ്ങളാണ് ഉയരുന്നത്. പൈലറ്റിന്റെ പ്രവർത്തി അവിസ്മരണീയമായ ഒരു അനുഭവം നൽകിയെന്ന് ഒരു വിഭാഗം അഭിപ്രായപ്പെടുമ്പോൾ, സുരക്ഷാ മാനദണ്ഡങ്ങളെ അവഗണിച്ച് മരങ്ങൾക്കരികിലേക്ക് മനഃപൂർവം എത്തിയത് അനാവശ്യമായ അപകടസാധ്യതകൾ ക്ഷണിച്ചുവരുത്തുന്നതാണെന്ന വിമർശനമാണ് പ്രധാനമായും ഉയരുന്നത്.
അഡ്വഞ്ചർ ടൂറിസത്തിൽ സുരക്ഷയ്ക്കും പ്രൊഫഷണൽ പെരുമാറ്റത്തിനും നൽകേണ്ട പ്രാധാന്യത്തെക്കുറിച്ചുള്ള വലിയ ചർച്ചകൾക്കാണ് ഈ സംഭവം വഴിവെച്ചിരിക്കുന്നത്. യാത്രക്കാരന്റെ സുരക്ഷയ്ക്കാണ് പ്രഥമ പരിഗണന നൽകേണ്ടതെന്നും, ഇത്തരത്തിലുള്ള പ്രകടനങ്ങൾ തൊഴിൽപരമായ സമീപനത്തിന് ചേർന്നതല്ലെന്നും ചൂണ്ടിക്കാട്ടി വിവിധ സോഷ്യൽ മീഡിയ അക്കൗണ്ടുകൾ രംഗത്തെത്തിയിട്ടുണ്ട്. അതേസമയം, കാര്യങ്ങളെ അനാവശ്യമായി വിവാദമാക്കേണ്ടതില്ലെന്നും യാത്രക്കാരിക്ക് വ്യത്യസ്തമായൊരു അനുഭവം നൽകാനുള്ള ചെറിയൊരു ശ്രമം മാത്രമാണിതെന്നും പൈലറ്റിനെ അനുകൂലിക്കുന്നവർ വാദിക്കുന്നു.
