ന്യൂഡൽഹി: പാർലമെന്റിൽ അവതരിപ്പിച്ച വനിതാ സംവരണ ബിൽ കാലഘട്ടത്തിന്റെ ആവശ്യമാണെന്നും, എതിർക്കുന്നവർക്ക് രാജ്യം മാപ്പ് നൽകില്ലെന്നും പ്രധാനമന്ത്രി നരേന്ദ്ര മോദി. വനിതാ സംവരണം നടപ്പിലാക്കാൻ ഇതിനുമുമ്പ് ലഭിച്ച അവസരങ്ങൾ രാജ്യം നഷ്ടപ്പെടുത്തിയെന്നും എന്നാൽ ഇനി ഒരു നിമിഷം പോലും വൈകിക്കാനാവില്ലെന്നും അദ്ദേഹം ലോകസഭയിൽ വ്യക്തമാക്കി. ചരിത്രം കുറിക്കാനുള്ള ഈ സുവർണ്ണ നിമിഷം രാജ്യത്തിന് പുതിയ ദിശ നൽകുമെന്നും അദ്ദേഹം കൂട്ടിച്ചേർത്തു.
സ്ത്രീശക്തി എന്നാൽ വികസിത ഭാരതമെന്ന് വിശേഷിപ്പിച്ച പ്രധാനമന്ത്രി, ശാക്തീകരിക്കപ്പെട്ട സ്ത്രീകളാണ് വികസിത ഭാരതത്തിന്റെ അടിത്തറയെന്ന് അടിവരയിട്ടു. സ്ത്രീകളുടെ നേതൃത്വത്തിലുള്ള വികസനമാണ് രാജ്യം ലക്ഷ്യമിടുന്നത്. ഈ ബിൽ പാസാക്കുന്നത് രാജ്യത്തിന്റെ വികസന യാത്രയിലെ സുപ്രധാനമായ ഒരു നാഴികക്കല്ലായിരിക്കും. രാഷ്ട്രീയ കാരണങ്ങളാൽ ഈ ബില്ലിനെ എതിർക്കുന്നവർക്ക് രാജ്യത്തെ സ്ത്രീസമൂഹം മാപ്പ് നൽകില്ലെന്ന് അദ്ദേഹം ഓർമ്മിപ്പിച്ചു. കേവലം ഒരു പാർട്ടിയുടെ രാഷ്ട്രീയ ലാഭത്തിന് വേണ്ടിയല്ല ഈ തീരുമാനമെന്നും, ജനാധിപത്യം ശക്തിപ്പെടുത്താനാണ് സർക്കാർ ഇതിലൂടെ ശ്രമിക്കുന്നതെന്നും അദ്ദേഹം പറഞ്ഞു.
ബില്ലിന്റെ ക്രെഡിറ്റ് തനിക്കും കേന്ദ്ര സർക്കാരിനും വേണ്ടെന്ന് വ്യക്തമാക്കിയ പ്രധാനമന്ത്രി, ഇതിന്റെ മുഴുവൻ ക്രെഡിറ്റും രാഷ്ട്രീയ കക്ഷികൾക്ക് എടുക്കാമെന്നും അറിയിച്ചു. ബില്ലിനെ രാഷ്ട്രീയ കണ്ണിലൂടെ നോക്കിക്കാണാതെ, രാജ്യത്തെ വനിതകളുടെ ഉന്നമനത്തിനായി എല്ലാവരും ഒറ്റക്കെട്ടായി നിൽക്കണമെന്നും അദ്ദേഹം ആവശ്യപ്പെട്ടു. മണ്ഡല പുനർനിർണ്ണയം നടത്തുമ്പോൾ ഒരു സംസ്ഥാനത്തോടും വിവേചനം കാണിക്കില്ലെന്നും പ്രധാനമന്ത്രി ഉറപ്പുനൽകി. രാഷ്ട്രീയ ലക്ഷ്യങ്ങൾക്കായി ചിലർ ഇല്ലാത്ത പ്രശ്നങ്ങൾ സൃഷ്ടിക്കുകയാണെന്നും ഇത്തരം ഒഴിവുകഴിവുകൾ പറയുന്നത് അവസാനിപ്പിക്കണമെന്നും അദ്ദേഹം മുന്നറിയിപ്പ് നൽകി. കഴിഞ്ഞ 30 വർഷത്തിനിടെ ലക്ഷക്കണക്കിന് സ്ത്രീകൾ വിവിധ മേഖലകളിൽ നേതാക്കളായി വളർന്നുവന്നിട്ടുണ്ട്. സ്ത്രീകളുടെ രാഷ്ട്രീയപരമായ അവകാശങ്ങൾക്കും അവരുടെ ശബ്ദം പാർലമെന്റിൽ മുഴങ്ങുന്നതിനും വനിതാ സംവരണം അത്യന്താപേക്ഷിതമാണ്. വനിതകളെ ഇനിയും കാത്തുനിർത്താനാവില്ലെന്നും അവരെ രാജ്യത്തിന്റെ മുൻനിരയിലേക്ക് നയിക്കാൻ സമയമായെന്നും പറഞ്ഞാണ് പ്രധാനമന്ത്രി തന്റെ പ്രസംഗം അവസാനിപ്പിച്ചത്.
