ന്യൂഡൽഹി: ഡൽഹി വനിതാ കമ്മീഷൻ അധ്യക്ഷയായി ലതാ ഗുപ്തയെ നിയമിച്ചു. ശ്യാം ബാല, മാൾതി വർമ്മ, ലതാ സിധി, സൻരക്ഷിക ശർമ്മ ഝ, രേണു ഭല്ല എന്നിവരെ കമ്മീഷൻ അംഗങ്ങളായും നിയമിച്ചതായി ഡൽഹി മുഖ്യമന്ത്രിയുടെ ഓഫീസ് ഔദ്യോഗികമായി അറിയിച്ചു. മുൻ അധ്യക്ഷ സ്വാതി മലിവാൾ 2024 ജനുവരിയിൽ രാജ്യസഭാംഗമായി തിരഞ്ഞെടുക്കപ്പെട്ടതിനെ തുടർന്ന് രാജിവെച്ചതോടെ, കഴിഞ്ഞ രണ്ട് വർഷത്തിലേറെയായി വനിതാ കമ്മീഷൻ അധ്യക്ഷ സ്ഥാനം ഒഴിഞ്ഞുകിടക്കുകയായിരുന്നു. പുതിയ നിയമനത്തോടെ കമ്മീഷന് വീണ്ടും പൂർണ നേതൃത്വം ലഭിച്ചിരിക്കുകയാണ്.
സ്ത്രീകളുടെ സുരക്ഷ, അന്തസ്സ്, അവകാശ സംരക്ഷണം, ശാക്തീകരണം എന്നിവ ഉറപ്പാക്കുന്നതിൽ വനിതാ കമ്മീഷൻ നിർണായക പങ്കാണ് വഹിക്കുന്നതെന്ന് മുഖ്യമന്ത്രിയുടെ ഓഫീസ് വ്യക്തമാക്കി. നിയമനത്തിന് പിന്നാലെ പ്രതികരിച്ച ലതാ ഗുപ്ത, സ്ത്രീസുരക്ഷയാണ് തന്റെ പ്രവർത്തനങ്ങളിലെ പ്രധാന പരിഗണനയെന്ന് വ്യക്തമാക്കി. എല്ലാ സ്ത്രീകൾക്കും ഭയമില്ലാതെ, എളുപ്പത്തിൽ വനിതാ കമ്മീഷനെ സമീപിക്കാൻ കഴിയുന്ന സാഹചര്യം ഒരുക്കുകയാണ് തന്റെ ആദ്യ ഉത്തരവാദിത്തമെന്നും അവർ കൂട്ടിച്ചേർത്തു.
നിലവിൽ ബിജെപി ഡൽഹി ഘടകം വൈസ് പ്രസിഡന്റാണ് ലതാ ഗുപ്ത. ലക്ഷ്മി നഗർ നിയമസഭാ മണ്ഡലത്തിലെ രണ്ട് വ്യത്യസ്ത വാർഡുകളെ പ്രതിനിധീകരിച്ച് മുനിസിപ്പൽ കൗൺസിലറായും ഇവർ പ്രവർത്തിച്ചിട്ടുണ്ട്. ലതാ ഗുപ്തയുടെ നേതൃത്വത്തിലുള്ള പുതിയ ഭരണസമിതിയിലൂടെ ഡൽഹിയിലെ വനിതാ ക്ഷേമ-സുരക്ഷാ പ്രവർത്തനങ്ങൾക്ക് കൂടുതൽ കരുത്തും വേഗതയും ലഭിക്കുമെന്ന പ്രതീക്ഷയിലാണ് ഭരണകൂടം.
