വിപണി: വെള്ളിയാഴ്ചത്തെ ഇടിവില് നിന്നും പാഠമുള്ക്കൊണ്ട്, വാരത്തിന്റെ ആദ്യ ദിനമായ തിങ്കളാഴ്ച ഇന്ത്യന് ഓഹരി വിപണി മികച്ച നേട്ടത്തോടെ വ്യാപാരം ആരംഭിച്ചു. അനുകൂലമായ ആഗോള സൂചനകളും അന്താരാഷ്ട്ര തലത്തിലുള്ള ജിയോപൊളിറ്റിക്കല് ആശങ്കകള്ക്ക് നേരിയ ശമനമുണ്ടായതും വിപണിക്ക് കരുത്തായി. വ്യാപാരത്തിന്റെ തുടക്കത്തിൽ തന്നെ സെൻസെക്സ് 390-ലധികം പോയിന്റുകൾ കുതിച്ചുയർന്ന് 77,190 നിലവാരത്തിന് അരികിലെത്തി. നിഫ്റ്റി 24,100 പോയിന്റ് ഭേദിക്കുകയും 0.5% നേട്ടത്തോടെ 24,129 എന്ന നിലയിൽ വ്യാപാരം തുടരുകയും ചെയ്യുന്നു. ലാർജ്-ക്യാപ് സൂചികകൾക്കൊപ്പം മിഡ്ക്യാപ്, സ്മോൾക്യാപ് സൂചികകളും മികച്ച പ്രകടനം കാഴ്ചവെക്കുന്നുണ്ട്.
യു.എസ്-ഇറാൻ സമാധാന ചർച്ചകളിലെ പുരോഗതിയും ഹോർമുസ് കടലിടുക്കിലെ തർക്കങ്ങൾ പരിഹരിക്കപ്പെടുമെന്ന പ്രതീക്ഷയും ആഗോള വിപണിക്ക് ആശ്വാസം നൽകി. ഇതിനൊപ്പം ക്രൂഡ് ഓയിൽ വില ബാരലിന് 80 ഡോളറിന് താഴേക്ക് എത്തിയത് എണ്ണ ഇറക്കുമതി ചെയ്യുന്ന ഇന്ത്യ പോലുള്ള രാജ്യങ്ങൾക്ക് അനുകൂലമായി. സാങ്കേതികമായി പരിശോധിച്ചാൽ, മുൻപ് വിപണിക്ക് തടസ്സമായിരുന്ന 24,078 എന്ന റെസിസ്റ്റൻസ് ലെവൽ ഇപ്പോൾ പ്രധാനപ്പെട്ട സപ്പോർട്ട് സോണായി മാറിയിട്ടുണ്ട്. നിഫ്റ്റി 50 സൂചിക നിലവിൽ ശക്തമായ ബുള്ളിഷ് ട്രെൻഡിലാണ് വ്യാപാരം തുടരുന്നത്. 24,180 – 24,220 പരിധിയാണ് നിഫ്റ്റിക്ക് മുന്നിലുള്ള അടുത്ത ലക്ഷ്യം. ഈ സോണിന് മുകളിലേക്ക് ശക്തമായ ബ്രേക്ക്ഔട്ട് ഉണ്ടായാൽ ഹ്രസ്വകാലയളവിൽ സൂചിക 24,300 – 24,400 നിലവാരങ്ങളിലേക്ക് കുതിക്കാൻ സാധ്യതയുണ്ട്.
റിലയൻസ് ഇൻഡസ്ട്രീസിന്റെ സബ്സിഡിയറി കമ്പനിയായ ‘ജിയോ പ്ലാറ്റ്ഫോംസ്’ ഐപിഒയ്ക്കായി ഡിആർഎച്ച്പി സമർപ്പിച്ചെന്ന വാർത്ത കമ്പനിയുടെ ഓഹരികളിൽ 2 ശതമാനത്തിലധികം കുതിപ്പുണ്ടാക്കി. വെള്ളിയാഴ്ച കനത്ത തകർച്ച നേരിട്ട ഐടി മേഖല ഇന്ന് മികച്ച തിരിച്ചുവരവാണ് നടത്തിയത്. ഇൻഫോസിസ്, ടെക് മഹീന്ദ്ര, എച്ച്.സി.എൽ ടെക്നോളജീസ് തുടങ്ങിയ ഓഹരികളിലെ വാല്യൂ ബയിംഗ് വിപണിയുടെ വീണ്ടെടുപ്പിനെ സഹായിച്ചു. കൂടാതെ, 3,400-ലധികം ഇലക്ട്രിക് കൊമേഴ്സ്യൽ വാഹനങ്ങൾ വിതരണം ചെയ്യാനുള്ള ഓർഡർ ലഭിച്ച പശ്ചാത്തലത്തിൽ ടാറ്റാ മോട്ടോഴ്സ് ഓഹരികളും മികച്ച നേട്ടം കൈവരിച്ചു. വിപണിയിലെ ഈ മുന്നേറ്റം കേവലം ഏതാനും ഓഹരികളിൽ മാത്രം ഒതുങ്ങാതെ എല്ലാ മേഖലകളിലേക്കും പടരുന്ന കാഴ്ചയാണ് കാണാൻ സാധിക്കുന്നത്.
