വാഷിംഗ്ടൺ: പശ്ചിമേഷ്യയിലെ സംഘർഷങ്ങൾക്ക് വിരാമമിട്ട് അമേരിക്കയും ഇറാനും തമ്മിൽ സമാധാന കരാറിൽ ഒപ്പുവെച്ചു. യുഎസ് പ്രസിഡന്റ് ഡൊണാൾഡ് ട്രംപും ഇറാൻ പ്രസിഡന്റ് മസൂദ് പെസഷ്കിയാനും ഡിജിറ്റൽ സംവിധാനത്തിലൂടെ 14 ഇന ധാരണാപത്രത്തിലാണ് ഒപ്പുവെച്ചത്. ഫ്രാൻസിൽ നടന്ന ജി7 ഉച്ചകോടിക്കിടെ വെർസൈൽസ് കൊട്ടാരത്തിൽ വെച്ച് ട്രംപ് കരാറിൽ ഒപ്പുവെച്ചതോടെ, ദശകങ്ങളായി തുടരുന്ന നയതന്ത്ര ശത്രുതയ്ക്ക് താൽക്കാലിക വിരാമമാവുകയാണ്.
ലോക സമ്പദ്വ്യവസ്ഥയെ തന്നെ പ്രതികൂലമായി ബാധിച്ച യുദ്ധസാഹചര്യത്തിന് അറുതി വരുത്തുന്നതാണ് ഈ കരാർ. ഹോർമുസ് കടലിടുക്ക് വഴി തടസ്സമില്ലാത്ത കപ്പൽ ഗതാഗതം പുനഃസ്ഥാപിക്കുമെന്നതാണ് കരാറിലെ പ്രധാന തീരുമാനം. അടിയന്തരമായി സൈനിക നീക്കങ്ങൾ അവസാനിപ്പിക്കാനും ലെബനോനിലെ യുദ്ധമുഖങ്ങളിൽ നിന്ന് പിന്മാറാനും ഇരുരാജ്യങ്ങളും സമ്മതിച്ചിട്ടുണ്ട്. 60 ദിവസത്തിനുള്ളിൽ സമഗ്രമായ അന്തിമ കരാറിലെത്താനാണ് ഇരു നേതാക്കളുടെയും തീരുമാനം.
ആണവ പദ്ധതികളുമായി ബന്ധപ്പെട്ട ആശങ്കകൾ ചർച്ചകളിലൂടെ പരിഹരിക്കാനും, ഇറാൻ മേലുള്ള ഉപരോധങ്ങളിൽ ഘട്ടംഘട്ടമായി ഇളവ് നൽകാനും ധാരണാപത്രത്തിൽ വ്യവസ്ഥയുണ്ട്. ഉപരോധങ്ങൾ നീക്കുന്നതിനൊപ്പം ഇറാന്റെ സാമ്പത്തിക പുനർനിർമ്മാണത്തിനായി 300 ബില്യൺ ഡോളറിന്റെ സ്വകാര്യ മേഖലയിൽ നിന്നുള്ള സഹായവും യുഎസ് വാഗ്ദാനം ചെയ്യുന്നു. ഇറാൻ ആണവായുധങ്ങൾ നിർമ്മിക്കില്ലെന്ന് ഉറപ്പുനൽകിയതോടെ മേഖലയിലെ ആശങ്കകൾക്ക് ശമനമായിട്ടുണ്ട്. അതേസമയം, ഈ കരാറിൽ ഇസ്രയേൽ ഭരണകൂടം അതൃപ്തി പ്രകടിപ്പിച്ചിട്ടുണ്ട്. കരാർ ലംഘിക്കപ്പെട്ടാൽ തിരിച്ചടി നേരിടുമെന്ന് ട്രംപ് മുന്നറിയിപ്പ് നൽകിയിട്ടുണ്ടെങ്കിലും, പശ്ചിമേഷ്യൻ രാഷ്ട്രീയത്തിൽ വലിയ മാറ്റങ്ങൾക്ക് വഴിയൊരുക്കുന്നതാണ് ഈ സമാധാന നീക്കം.
