ന്യൂഡൽഹി: ലോക പരിസ്ഥിതി ദിനത്തോടനുബന്ധിച്ച് ഡൽഹിയിൽ പതിനെട്ട് ‘നമോ ഓക്സിജൻ പാർക്കുകൾ’ ഉദ്ഘാടനം ചെയ്തു. കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രി ഭൂപേന്ദർ യാദവും ഡൽഹി മുഖ്യമന്ത്രി രേഖാ ഗുപ്തയും ചേർന്നാണ് പദ്ധതി ഉദ്ഘാടനം ചെയ്തത്. ഇതിനൊപ്പം രാജ്യവ്യാപകമായി നടപ്പിലാക്കുന്ന ‘ഏക് പേഡ് മാ കേ നാം’ (അമ്മയുടെ പേരിൽ ഒരു തൈ) കാമ്പയിന്റെ ഭാഗമായുള്ള വിവിധ പരിസ്ഥിതി സൗഹൃദ പദ്ധതികൾക്കും കേന്ദ്രമന്ത്രി തുടക്കം കുറിച്ചു.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ പരിസ്ഥിതി സംരക്ഷണ പ്രവർത്തനങ്ങളിൽ ഇന്ത്യ ആഗോളതലത്തിൽ മുൻപന്തിയിലാണെന്ന് ഭൂപേന്ദർ യാദവ് പറഞ്ഞു. സൗരോർജ്ജ ഉത്പാദന ശേഷി വർദ്ധിപ്പിക്കുക, അന്താരാഷ്ട്ര സോളാർ അലയൻസ് രൂപീകരിക്കുക, ഇന്റർനാഷണൽ ബിഗ് ക്യാറ്റ് അലയൻസ് ആരംഭിക്കുക, യുഎൻ കാലാവസ്ഥാ വ്യതിയാന കൺവെൻഷന് കീഴിലുള്ള ലക്ഷ്യങ്ങൾ നിശ്ചിത സമയത്തിന് മുൻപ് തന്നെ കൈവരിക്കുക തുടങ്ങിയ നേട്ടങ്ങൾ അദ്ദേഹം എടുത്തുപറഞ്ഞു. ‘ഏക് പേഡ് മാ കേ നാം’ എന്ന കാമ്പയിൻ വൃക്ഷത്തൈ നടീലിനെ നന്ദിയും ഉത്തരവാദിത്തവുമുള്ള ഒരു ജനകീയ പ്രസ്ഥാനമാക്കി മാറ്റിയെന്നും, തൈകൾ നടുന്നതിനൊപ്പം അവയെ വരുംതലമുറയ്ക്കായി സംരക്ഷിച്ചു വളർത്താൻ ഓരോ പൗരനും മുന്നോട്ടു വരണമെന്നും അദ്ദേഹം അഭ്യർത്ഥിച്ചു.
ഡൽഹിയിലെ വായുഗുണനിലവാരം മെച്ചപ്പെടുത്തുന്നതിന് ഹരിതാഭ വർദ്ധിപ്പിക്കുകയെന്നതാണ് ഏറ്റവും പ്രധാനപ്പെട്ട മാർഗ്ഗമെന്ന് മുഖ്യമന്ത്രി രേഖാ ഗുപ്ത വ്യക്തമാക്കി. ഡൽഹിയിലുടനീളം 15 ലക്ഷം വൃക്ഷത്തൈകൾ നട്ടുപിടിപ്പിക്കാനാണ് സർക്കാർ ലക്ഷ്യമിടുന്നത്. പരിസ്ഥിതി സംരക്ഷണത്തിൽ പൊതുജന പങ്കാളിത്തം അനിവാര്യമാണെന്നും, തൈകൾ വെച്ചുപിടിപ്പിക്കുന്നതിൽ മാത്രമല്ല അവയുടെ തുടർന്നുള്ള പരിചരണത്തിലും ജനങ്ങൾ ഒത്തൊരുമിച്ച് പ്രവർത്തിക്കണമെന്നും മുഖ്യമന്ത്രി കൂട്ടിച്ചേർത്തു. ചടങ്ങിന്റെ ഭാഗമായി വിശിഷ്ടാതിഥികൾ വൃക്ഷത്തൈകൾ നടുകയും, ‘പൊടിരഹിത ഡൽഹി’ പദ്ധതിയുടെ പ്രദർശനം സന്ദർശിക്കുകയും ചെയ്തു. കൂടാതെ, ‘വർക്കിംഗ് പ്ലാൻ ഫോർ ഡൽഹി’, ‘അസോള ഭാട്ടി സാങ്ച്വറി മാനേജ്മെന്റ് പ്ലാൻ’, ‘ഡൽഹി ബേർഡ് അറ്റ്ലസ്’ എന്നീ പരിസ്ഥിതി പ്രസിദ്ധീകരണങ്ങളും ചടങ്ങിൽ പ്രകാശനം ചെയ്തു
