ദേശീയ വാർത്ത: എ.യു സ്മോൾ ഫിനാൻസ് ബാങ്ക് നാലാം പാദത്തിലെ കണക്കുകൾ പുറത്തുവിട്ടു. അറ്റാദായത്തിൽ 65% വളർച്ചയും ഓഹരിയുടമകൾക്ക് ലാഭവിഹിതവും പ്രഖ്യാപിച്ചു. ബാങ്കിൻ്റെ മികച്ച പ്രകടനത്തിൽ ഓഹരി ഉടമകളും സന്തോഷത്തിലാണ്.
രാജ്യത്തിലെ പ്രമുഖ ബാങ്കിംഗ് സ്ഥാപനമായ എ.യു സ്മോൾ ഫിനാൻസ് ബാങ്ക് നടപ്പ് സാമ്പത്തിക വർഷത്തിലെ നാലാം പാദ ഫലങ്ങൾ പ്രഖ്യാപിച്ചു. മികച്ച ബിസിനസ് പ്രകടനത്തോടെ അറ്റാദായത്തിൽ 65 ശതമാനം വളർച്ചയാണ് ബാങ്ക് രേഖപ്പെടുത്തിയത്. അറ്റ പലിശ വരുമാനത്തിലും ആസ്തി ഗുണനിലവാരത്തിലും മികച്ച മുന്നേറ്റം കൈവരിച്ചതോടൊപ്പം ഓഹരിയുടമകൾക്ക് ലാഭവിഹിതവും ബാങ്ക് പ്രഖ്യാപിച്ചിട്ടുണ്ട്. 2026 മാർച്ച് പാദത്തിൽ 831.87 കോടി രൂപയാണ് അറ്റാദായം. മുൻ വർഷം ഇത് 503.7 കോടി രൂപയായിരുന്നു. അറ്റ പലിശ വരുമാനം 23 ശതമാനം വർധിച്ചു. കിട്ടാക്കടം പിരിച്ചെടുത്തതിലെ പുരോഗതിയും ടാക്സ് റീഫണ്ടും ഈ നേട്ടത്തിന് സഹായകമായി. ഓഹരിയൊന്നിന് ഒരു രൂപയാണ് ലാഭവിഹിതം.
കൂടാതെ 13,500 കോടി രൂപയുടെ മൂലധന സമാഹരണത്തിനും ബാങ്ക് ലക്ഷ്യമിടുന്നുണ്ട്. ക്വാളിഫൈഡ് ഇൻസ്റ്റിറ്റ്യൂഷണൽ പ്ലേസ്മെൻ്റ് വഴി 7,500 കോടി രൂപ വരെ സമാഹരിക്കാൻ ബോർഡ് അനുമതി നൽകി. ബോണ്ടുകൾ, നോൺ-കൺവേർട്ടബിൾ ഡിബഞ്ചറുകൾ എന്നിവ വഴി 6,000 കോടി രൂപ കൂടി സമാഹരിക്കും. എ.യു സ്മോൾ ഫിനാൻസ് ബാങ്ക് എം.ഡി ആൻഡ് സി.ഇ.ഒ സഞ്ജയ് അഗർവാളാണ് ഇക്കാര്യം അറിയിച്ചത്. ബാങ്കിൻ്റെ ഓഹരികൾ എൻ.എസ്.ഇയിൽ 1,043 രൂപ നിലവാരത്തിലാണ് വ്യാപാരം അവസാനിപ്പിച്ചത്.
