താലിൻ: റീലൊക്കേഷനായി ലോകം ഉറ്റുനോക്കുന്ന ഏറ്റവും മികച്ച കേന്ദ്രമായി എസ്റ്റോണിയ മാറുന്നു. ഈ വർഷത്തെ റുമാവി ഗ്ലോബൽ റീലൊക്കേഷൻ ഇൻഡക്സിൽ 72.8 പോയിന്റ് നേടിയാണ് എസ്റ്റോണിയ ഒന്നാം സ്ഥാനത്തെത്തിയത്. നികുതി ഘടന, ആരോഗ്യം, സുരക്ഷ, ബിസിനസ് അവസരങ്ങൾ എന്നീ മേഖലകളിലെ മികവാണ് ഈ നേട്ടത്തിലേക്ക് രാജ്യത്തെ നയിച്ചത്. 72.6 പോയിന്റുമായി സിംഗപ്പൂർ രണ്ടാം സ്ഥാനത്തും, 72.0 പോയിന്റുമായി മലേഷ്യ മൂന്നാം സ്ഥാനത്തും എത്തിയിട്ടുണ്ട്.
ആഗോളതലത്തിൽ സംരംഭക സൗഹൃദ അന്തരീക്ഷത്തിലും നികുതി നയങ്ങളിലും സിംഗപ്പൂർ തുടർന്നും ആധിപത്യം പുലർത്തുന്നുണ്ട്. പൂജ്യം നികുതി ഈടാക്കുന്ന രാജ്യങ്ങളെപ്പോലും മറികടന്നുകൊണ്ടുള്ള ഈ മുന്നേറ്റത്തിന് പിന്നിൽ ശക്തമായ നിയമവാഴ്ച, സുരക്ഷിതമായ സാമൂഹിക അന്തരീക്ഷം, മികച്ച ബാങ്കിംഗ് സംവിധാനം എന്നിവയുണ്ട്. ഇത്തരം ഘടകങ്ങളാണ് ലോകമെമ്പാടുമുള്ള വ്യവസായികളെയും സംരംഭകരെയും ബിസിനസ്സ് വിപുലീകരണത്തിനായി ഈ രാജ്യങ്ങളെ തിരഞ്ഞെടുക്കാൻ പ്രേരിപ്പിക്കുന്നത്.
അതേസമയം, റുമാവി ഗ്ലോബൽ റീലൊക്കേഷൻ ഇൻഡക്സിൽ 60.6 സ്കോറുമായി ഇന്ത്യ 100-ാം സ്ഥാനത്താണ് എത്തിയിരിക്കുന്നത്. താങ്ങാനാവുന്ന ജീവിതച്ചെലവ്, മികച്ച ഭവന ലഭ്യത, വളർന്നുവരുന്ന സ്റ്റാർട്ടപ്പ് ആവാസവ്യവസ്ഥ എന്നിവയാണ് ഇന്ത്യയുടെ പ്രധാന കരുത്ത്. ഡിജിറ്റൽ നോമാഡുകൾക്ക് (ഡിജിറ്റൽ നാടോടികൾ) അനുകൂലമായ രാജ്യങ്ങളുടെ പട്ടികയിൽ 73-ാം സ്ഥാനത്തെത്താൻ ഇന്ത്യയ്ക്ക് സാധിച്ചിട്ടുണ്ട്. എങ്കിലും, വായു ഗുണനിലവാരം, ബിസിനസ് അവസരങ്ങൾ, പൗരന്മാരല്ലാത്തവർക്കുള്ള സ്വത്തവകാശം തുടങ്ങിയ വിഷയങ്ങളിൽ ഇന്ത്യയ്ക്ക് വലിയ ഇടിവ് സംഭവിച്ചതായാണ് റിപ്പോർട്ട് സൂചിപ്പിക്കുന്നത്. നികുതി സൗഹൃദ റാങ്കിംഗിൽ 126-ാം സ്ഥാനത്തേക്ക് പിന്തള്ളപ്പെട്ടതും സംരംഭകർക്കും വിരമിച്ചവർക്കും ഇടയിലുള്ള സ്വീകാര്യതയിൽ വന്ന കുറവും രാജ്യത്തിന്റെ ആഗോള ആകർഷണീയതയെ ബാധിക്കുന്നുണ്ട്.
സാമ്പത്തികം, നികുതി, ജീവിതക്ഷമത, ആരോഗ്യം, സുരക്ഷ, സ്ഥിരത, സ്ഥിരതാമസം, അവസരങ്ങൾ എന്നീ നാല് പ്രധാന മേഖലകളെ അടിസ്ഥാനമാക്കിയാണ് ഈ സൂചിക തയ്യാറാക്കിയിട്ടുള്ളത്.
