ന്യൂഡൽഹി: ഇന്ത്യയുടെ സാങ്കേതിക മുന്നേറ്റത്തിന് കരുത്തുപകരുന്ന നിർണ്ണായക നിക്ഷേപ പ്രഖ്യാപനവുമായി ആമസോൺ. പ്രധാനമന്ത്രി നരേന്ദ്ര മോദിയുമായി ആമസോൺ സിഇഒ ആൻഡി ജാസ്സി ഡൽഹിയിൽ നടത്തിയ കൂടിക്കാഴ്ചയ്ക്ക് പിന്നാലെയാണ്, 2030-ഓടെ ഇന്ത്യയിൽ മൊത്തം 48 ബില്യൺ ഡോളറിന്റെ നിക്ഷേപം നടത്തുമെന്ന ഔദ്യോഗിക പ്രഖ്യാപനം വന്നത്. ഇതിൽ 13 ബില്യൺ ഡോളർ ആർട്ടിഫിഷ്യൽ ഇന്റലിജൻസ് (എഐ), ക്ലൗഡ് ഇൻഫ്രാസ്ട്രക്ചർ വികസനത്തിനായി മാത്രമായിരിക്കും കമ്പനി ചെലവഴിക്കുക.
ഈ വലിയ നിക്ഷേപം ഇന്ത്യയെ ആഗോളതലത്തിൽ എഐ, ക്ലൗഡ് സേവനങ്ങളുടെ പ്രധാന കേന്ദ്രമാക്കി മാറ്റും. മുംബൈ, ഹൈദരാബാദ് എന്നിവിടങ്ങളിലെ ആമസോൺ വെബ് സർവീസസ് (AWS) ഡാറ്റാ സെന്ററുകൾ കൂടുതൽ വിപുലീകരിക്കും. സ്റ്റാർട്ടപ്പുകൾക്കും സർക്കാർ സ്ഥാപനങ്ങൾക്കും അത്യാധുനിക എഐ ചിപ്പുകളും സുരക്ഷിതമായ ക്ലൗഡ് സാങ്കേതികവിദ്യയും വേഗത്തിൽ ലഭ്യമാക്കാൻ ഇതിലൂടെ സാധിക്കും. കൂടാതെ, ഇ-കൊമേഴ്സ് മേഖലയിലെ വളർച്ച ലക്ഷ്യമിട്ട് ഈ വർഷം തന്നെ 20 പുതിയ ഫുൾഫിൽമെന്റ് സെന്ററുകളും 100-ലധികം ഡെലിവറി സ്റ്റേഷനുകളും തുറക്കാനും ആമസോൺ പദ്ധതിയിടുന്നു.
ഇന്ത്യൻ വിപണിയോടുള്ള തങ്ങളുടെ ദീർഘകാല പ്രതിബദ്ധതയാണ് ഈ നിക്ഷേപത്തിലൂടെ ആമസോൺ വ്യക്തമാക്കുന്നത്. 2010 മുതൽ 2030 വരെയുള്ള കാലയളവിൽ ഇന്ത്യയിൽ നടത്തുന്ന ആകെ നിക്ഷേപം 88 ബില്യൺ ഡോളറായി ഉയരും. ഡിജിറ്റൽ ഇന്ത്യ എന്ന ലക്ഷ്യത്തിന് കരുത്തേകി 3.8 ദശലക്ഷം തൊഴിലവസരങ്ങൾ സൃഷ്ടിക്കാനും, 15 ദശലക്ഷം ചെറുകിട ബിസിനസ്സുകളെ എഐ സാങ്കേതികവിദ്യയിലൂടെ ശാക്തീകരിക്കാനും, 4 ദശലക്ഷം സർക്കാർ സ്കൂൾ വിദ്യാർത്ഥികൾക്ക് എഐ വിദ്യാഭ്യാസം നൽകാനും കമ്പനി ലക്ഷ്യമിടുന്നു. ഇന്ത്യയുടെ വികസന സ്വപ്നങ്ങളിൽ പങ്കാളിയാകാൻ കഴിഞ്ഞതിൽ അഭിമാനമുണ്ടെന്ന് വ്യക്തമാക്കിയ ആൻഡി ജാസ്സി, ഇന്ത്യയുടെ വളർച്ചാ പാതയിൽ ഏറ്റവും വിശ്വസ്തനായ പങ്കാളിയായി തുടരുമെന്നും കൂട്ടിച്ചേർത്തു.
