ന്യൂഡൽഹി: നീറ്റ് ചോദ്യപേപ്പർ ചോർച്ചാക്കേസിൽ സിബിഐ അന്വേഷണം കേരളത്തിലേക്കും വ്യാപിപ്പിക്കുന്നു. രാജസ്ഥാൻ പോലീസ് കണ്ടെത്തിയ 200 വിദ്യാർത്ഥികളുടെ പട്ടികയിൽ കേരളത്തിലെ രണ്ട് ജില്ലകളിൽ നിന്നുള്ളവർ ഉൾപ്പെട്ടതായി സൂചനയുണ്ട്. രാജസ്ഥാൻ പോലീസിന്റെ പ്രത്യേക സംഘത്തിൽ നിന്ന് കേസ് ഏറ്റെടുത്ത സിബിഐ, ജയ്പൂരിലെത്തി നിർണായക രേഖകൾ ശേഖരിച്ചു. ‘മാതൃകാ ചോദ്യപേപ്പർ’ എന്ന പേരിൽ ചോർന്ന ചോദ്യങ്ങൾ കൈപ്പറ്റിയവരിൽ കേരളത്തിലെ വിദ്യാർത്ഥികളും ഉൾപ്പെട്ടിട്ടുണ്ടെന്നാണ് വിവരം. ഇവരെ സിബിഐ ഉടൻ ചോദ്യം ചെയ്തേക്കും.
കേരളത്തിൽ എംബിബിഎസ് പഠിക്കുന്ന രാജസ്ഥാൻ സ്വദേശിയായ വിദ്യാർത്ഥി വഴിയാണ് സിക്കറിലേക്ക് ചോദ്യപേപ്പർ എത്തിയത്. ഇതേ കണ്ണി വഴിയാണോ കേരളത്തിലും ചോദ്യങ്ങൾ പ്രചരിച്ചതെന്ന് അന്വേഷണസംഘം പരിശോധിക്കുന്നുണ്ട്. നിലവിൽ നാല് പ്രത്യേക സിബിഐ സംഘങ്ങളാണ് കേസ് അന്വേഷിക്കുന്നത്. കേസിൽ രാജസ്ഥാൻ പോലീസ് കസ്റ്റഡിയിലെടുത്ത ദിനേഷ് ബിൻവാൾ ബിജെപി നേതാവാണെന്ന് കോൺഗ്രസ് ആരോപിച്ചു. പ്രമുഖ ബിജെപി നേതാക്കൾക്കൊപ്പം ഇയാൾ നിൽക്കുന്ന ചിത്രങ്ങൾ കോൺഗ്രസ് തങ്ങളുടെ ഔദ്യോഗിക എക്സ് (ട്വിറ്റർ) അക്കൗണ്ടിലൂടെ പുറത്തുവിട്ടു. എന്നാൽ ഭരണപക്ഷത്തുനിന്ന് ഇതിനോട് പ്രതികരണമൊന്നും വന്നിട്ടില്ല.
നീറ്റ് ക്രമക്കേടിൽ ഇടപെടണമെന്നാവശ്യപ്പെട്ട് മെഡിക്കൽ സംഘടനയായ എഎകെഎംഎ സുപ്രീംകോടതിയെ സമീപിച്ചു. നാഷണൽ ടെസ്റ്റിംഗ് ഏജൻസിക്ക് പകരം പുതിയ സംവിധാനം വേണമെന്നും, കോടതിയുടെ നേരിട്ടുള്ള മേൽനോട്ടത്തിൽ പുനഃപരീക്ഷ നടത്തണമെന്നുമാണ് ഹർജിയിലെ പ്രധാന ആവശ്യം. പരീക്ഷാ തട്ടിപ്പ് സംഘത്തിന്റെ പ്രവർത്തനങ്ങൾ ഓരോന്നായി പുറത്തുവരുന്ന സാഹചര്യത്തിൽ, രാജസ്ഥാൻ പോലീസ് നേരത്തെ ശേഖരിച്ച 200 വിദ്യാർത്ഥികളുടെയും 75 രക്ഷിതാക്കളുടെയും വിവരങ്ങൾ സിബിഐക്ക് വലിയ മുതൽക്കൂട്ടാകും. വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ട്.
