മുംബൈ: ഐപിഎല്ലിലെ മുംബൈ ഇന്ത്യന്സ് താരം ഹാര്ദിക് പാണ്ഡ്യയുടെ ടീം മാറ്റവുമായി ബന്ധപ്പെട്ട അഭ്യൂഹങ്ങള് കായികരംഗത്ത് ചര്ച്ചയാകുന്നു. താരം തന്റെ പഴയ തട്ടകമായ ഗുജറാത്ത് ടൈറ്റന്സിലേക്ക് തിരിച്ചെത്താന് താല്പര്യം പ്രകടിപ്പിച്ചതായാണ് പുറത്തുവരുന്ന റിപ്പോര്ട്ടുകള്. എന്നാല്, തിരിച്ചുവരവിനായി ഹാര്ദിക് മുന്നോട്ടുവെച്ച നായകസ്ഥാനം വേണമെന്ന നിബന്ധന ചര്ച്ചകള്ക്ക് തടസ്സമായിരിക്കുകയാണ്.
2026ലെ ഐപിഎല് സീസണിലെ മുംബൈ ഇന്ത്യന്സിന്റെ മോശം പ്രകടനത്തിന് പിന്നാലെയാണ് താരം ടീം വിടുമെന്ന തരത്തിലുള്ള വാര്ത്തകള് ശക്തമായത്. ഇതിനായി ഗുജറാത്ത് ടൈറ്റന്സ് മാനേജ്മെന്റ് നിലവിലെ നായകന് ശുഭ്മാന് ഗില്ലുമായി ചര്ച്ചകള് നടത്തിയിരുന്നു. ഹാര്ദിക്കിനെ ടീമിലെടുക്കുന്നതില് ഗില്ലിന് എതിര്പ്പില്ലെങ്കിലും, ക്യാപ്റ്റന് സ്ഥാനം വിട്ടുകൊടുക്കാന് ടീം മാനേജ്മെന്റ് തയ്യാറായിട്ടില്ല. കളിക്കാരനെന്ന നിലയില് ഹാര്ദിക്കിനെ സ്വീകരിക്കാമെന്ന നിലപാടിലാണ് ഗുജറാത്ത് നേതൃത്വം.
മുംബൈ ഇന്ത്യന്സ് നായകസ്ഥാനം ഏറ്റെടുത്തതിന് പിന്നാലെ ഹാര്ദിക് വലിയ രീതിയിലുള്ള ആരാധക പ്രതിഷേധം നേരിട്ടിരുന്നു. ഇതിനിടെ ചെന്നൈ സൂപ്പര് കിങ്സ്, കൊല്ക്കത്ത നൈറ്റ് റൈഡേഴ്സ് തുടങ്ങിയ ടീമുകളുമായി താരം ചര്ച്ച നടത്തിയെന്ന റിപ്പോര്ട്ടുകള് പുറത്തുവന്നെങ്കിലും ഹാര്ദിക്കിന്റെ വക്താവ് ഇത് നിഷേധിച്ചു. താരം മറ്റ് ഫ്രാഞ്ചൈസികളുമായി നേരിട്ട് ചര്ച്ച നടത്തിയിട്ടില്ലെന്നും, ഭാവി തീരുമാനങ്ങള് മുംബൈ ഇന്ത്യന്സ് മാനേജ്മെന്റിന്റെ അറിവോടെയായിരിക്കുമെന്നുമാണ് വിശദീകരണം. 2022-ല് ഗുജറാത്ത് ടൈറ്റന്സിനെ ചാമ്പ്യന്മാരാക്കിയ നായകനാണ് ഹാര്ദിക് പാണ്ഡ്യയെങ്കിലും, നിലവിലെ സാഹചര്യത്തില് താരത്തിന്റെ ഐപിഎല് ഭാവി അനിശ്ചിതത്വത്തിലാണ്.
