കൊച്ചി: ക്രമസമാധാന പാലനത്തിന്റെ പുതിയ ദൃശ്യാനുഭവവുമായി ‘ലോ ആൻഡ് ഓർഡർ’ എന്ന ചിത്രം എത്തുന്നു. പ്രകാശ് വർമ അവതരിപ്പിക്കുന്ന ജോർജ് സാർ എന്ന പൊലീസ് ഉദ്യോഗസ്ഥനെയും അഞ്ച് യുവ പൊലീസ് ഓഫീസർമാരെയും കേന്ദ്രീകരിച്ചാണ് ചിത്രത്തിന്റെ കഥ വികസിക്കുന്നത്. ജൂലൈ 24-ന് ചിത്രം തിയേറ്ററുകളിൽ റിലീസ് ചെയ്യുമെന്ന് അണിയറപ്രവർത്തകർ ഔദ്യോഗികമായി പ്രഖ്യാപിച്ചു. ‘തുടരും’ എന്ന ചിത്രത്തിലൂടെ ശ്രദ്ധേയനായ പ്രകാശ് വർമയുടെ പൊലീസ് യൂണിഫോമിലുള്ള ലുക്കാണ് പുതിയ പോസ്റ്ററിലെ പ്രധാന ആകർഷണം.രഞ്ജിത്ത് സംവിധാനം ചെയ്യുന്ന ഈ ചിത്രം വലിയ കാൻവാസിലുള്ള ഒരു മാസ് ആക്ഷൻ എന്റർടെയ്നറായാണ് അണിയിച്ചൊരുക്കുന്നത്. സത്യം സിനിമാസിന്റെയും മഹാ സുബൈർ മൂവിസിന്റെയും ബാനറിൽ പ്രേമചന്ദ്രൻ എ.ജി, മഹാ സുബൈർ എന്നിവർ ചേർന്ന് നിർമ്മിക്കുന്ന ചിത്രത്തിന് തിരക്കഥയൊരുക്കുന്നത് ഉദയ് കൃഷ്ണയാണ്. ക്രമസമാധാനം ഉറപ്പാക്കാൻ നിയോഗിക്കപ്പെട്ട അഞ്ച് യുവ സബ് ഇൻസ്പെക്ടർമാർക്കും അവർക്ക് കരുത്തായി ഒപ്പമുള്ള മുതിർന്ന ഉദ്യോഗസ്ഥനും ചുറ്റും നടക്കുന്ന സംഭവവികാസങ്ങളാണ് ചിത്രത്തിന്റെ പ്രമേയം. കൊച്ചി, തിരുവനന്തപുരം, കോട്ടയം, വയനാട്, കണ്ണൂർ എന്നിവിടങ്ങളിലായി 90 ദിവസം കൊണ്ടാണ് സിനിമയുടെ ചിത്രീകരണം പൂർത്തിയാക്കിയത്.വലിയ താരനിരയും ആക്ഷൻ പ്രാധാന്യമുള്ള പ്രമേയവുമാണ് ചിത്രത്തിന്റെ പ്രധാന പ്രത്യേകത. അഭിരാമി പ്രധാന കഥാപാത്രത്തെ അവതരിപ്പിക്കുന്ന ചിത്രത്തിൽ ഋതു ദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൽ സുദർശൻ, നിജാദ് ബാബു തോമസ്, ഷേർഷ ഷെരിഫ്, റിനോഷ് ജോർജ്, അമൽ ജോസ് ആന്റണി, ബോബി കുര്യൻ, വി.കെ. പ്രകാശ്, സുരേഷ് കൃഷ്ണ, ജോയ് മാത്യു, ദേവൻ, അജയ് വാസുദേവ്, ശങ്കർ രാമകൃഷ്ണൻ തുടങ്ങിയവർ വേഷമിടുന്നു. ഷിബു ചക്രവർത്തിയുടെ വരികൾക്ക് ജോ ഡാനിയേൽ സംഗീതം നൽകുന്നു. ബിജിബാൽ പശ്ചാത്തല സംഗീതമൊരുക്കുന്ന ചിത്രത്തിന്റെ ആക്ഷൻ രംഗങ്ങൾ കലൈ കിംഗ്സ്റ്റൺ, ഫീനിക്സ് പ്രഭു, മാഫിയ ശശി, പി.സി സ്റ്റണ്ട്സ് എന്നിവർ ചേർന്നാണ് സംവിധാനം ചെയ്യുന്നത്.
