ഓഹരി വിപണി: പൊറിഞ്ചു വെളിയത്തിന്റെ പുതിയ ‘സൂപ്പർ സ്റ്റോക്ക്’; 1 മാസത്തിൽ 36% കുതിച്ച് ഷിഗാൻ ക്വാണ്ടം ടെക്.
പ്രമുഖ ഓഹരി നിക്ഷേപകനായ പൊറിഞ്ചു വെളിയത്ത് തന്റെ പോർട്ട്ഫോളിയോയിൽ ഉൾപ്പെടുത്തിയ പുതിയ ഓഹരിയാണ് ഇപ്പോൾ ഓഹരി വിപണിയിലെ ചർച്ചാവിഷയം. ഓട്ടോ ആൻസിലറി വിഭാഗത്തിൽ പ്രവർത്തിക്കുന്ന ഷിഗാൻ ക്വാണ്ടം ടെക് എന്ന കമ്പനിയാണ് അദ്ദേഹം പുതുതായി തിരഞ്ഞെടുത്തത്. വെറും ഒരു മാസത്തിനുള്ളിൽ 35.8 ശതമാനം നേട്ടമാണ് ഈ ഓഹരി നിക്ഷേപകർക്ക് നൽകിയത്. 75.70 രൂപ എന്ന അപ്പർ സർക്യൂട്ട് നിലവാരത്തിലാണ് ഈ ഓഹരിയുള്ളത്.
2008-ൽ സ്ഥാപിതമായ ഈ കമ്പനി പ്രധാനമായും എൽ.എൻ.ജി, സി.എൻ.ജി, ഹൈഡ്രജൻ ഫ്യുവൽ കിറ്റ് സിസ്റ്റങ്ങളുടെ ഡിസൈനിങ്, നിർമ്മാണം, കയറ്റുമതി എന്നിവയിലാണ് ശ്രദ്ധ കേന്ദ്രീകരിക്കുന്നത്. വിവിധ തരം വാഹനങ്ങളിലും വ്യവസായിക ആവശ്യങ്ങൾക്കുമാണ് ഇത്തരം കിറ്റുകൾ ഉപയോഗിക്കുന്നത്. 2020 ഏപ്രിൽ മുതൽ ഫയർ ഡിറ്റക്ഷൻ, അലാം സിസ്റ്റം തുടങ്ങിയവയുടെ നിർമ്മാണവും കമ്പനി നടത്തുന്നുണ്ട്. സി.എൻ.ജി ഫ്യുവൽ സിസ്റ്റം വിവിധ ലോകരാജ്യങ്ങളിലേക്ക് കമ്പനി കയറ്റുമതി ചെയ്യുന്നു.
ലഭ്യമായ പുതിയ വിവരങ്ങൾ പ്രകാരം, 2026 മാർച്ച് പാദത്തിൽ പൊറിഞ്ചു വെളിയത്ത് പുതിയതായി നിക്ഷേപം നടത്തിയ ഓഹരിയാണിത്. കമ്പനിയുടെ 2,35,500 ഓഹരികളാണ് അദ്ദേഹത്തിന്റെ പോർട്ട്ഫോളിയോയിലുള്ളത്. അതായത് കമ്പനിയുടെ മൊത്തം ഓഹരികളുടെ 1.2 ശതമാനം വരുമിത്. ഏകദേശം 1.8 കോടി രൂപയാണ് ഈ ഹോൾഡിംഗിന്റെ ഇപ്പോഴത്തെ മൂല്യം. നിക്ഷേപം നടത്തുന്നതിന് മുൻപ് സ്വന്തമായി പഠനം നടത്തുകയോ സർട്ടിഫൈഡ് സാമ്പത്തിക വിദഗ്ധരുടെ ഉപദേശം തേടുകയോ ചെയ്യുക.
