ഗുരുവായൂർ: വാണിജ്യ ആവശ്യങ്ങൾക്കുള്ള എൽപിജി സിലിണ്ടറുകളുടെ വിലയിൽ വീണ്ടും വർധനവ്. മെയ് മാസത്തിന് പിന്നാലെ ജൂൺ ഒന്നു മുതൽ പുതുക്കിയ നിരക്ക് പ്രാബല്യത്തിൽ വന്നതോടെ റെസ്റ്റോറന്റുകൾ ഉൾപ്പെടെയുള്ള ചെറുകിട വ്യാപാര മേഖലയ്ക്ക് കനത്ത തിരിച്ചടിയായിരിക്കുകയാണ്. ഡൽഹിയിൽ 19 കിലോഗ്രാം വാണിജ്യ സിലിണ്ടറിന് 42 രൂപ വർധിച്ച് 3,113.5 രൂപയായി ഉയർന്നു. കൊൽക്കത്തയിൽ 53.5 രൂപ വർധിച്ച് 3,255.5 രൂപയായും നിശ്ചയിച്ചു. കൂടാതെ, അഞ്ച് കിലോഗ്രാം സിലിണ്ടറുകൾക്ക് 11 രൂപ വീതവും വർധിപ്പിച്ചിട്ടുണ്ട്. ഗാർഹിക ആവശ്യങ്ങൾക്കുള്ള എൽപിജി സിലിണ്ടറുകളുടെ വിലയിൽ നിലവിൽ മാറ്റമില്ല.
പശ്ചിമേഷ്യൻ പ്രതിസന്ധി മൂലം ആഗോള വിപണിയിൽ എണ്ണ വിതരണം തടസ്സപ്പെട്ടതാണ് വിലക്കയറ്റത്തിന് കാരണമായതെന്നാണ് റിപ്പോർട്ടുകൾ. അതേസമയം, രാജ്യത്ത് എൽപിജി, പെട്രോൾ, ഡീസൽ എന്നിവയുടെ മതിയായ കരുതൽ ശേഖരമുണ്ടെന്നും റിഫൈനറികൾ പരമാവധി ശേഷിയിൽ പ്രവർത്തിക്കുന്നുണ്ടെന്നും സർക്കാർ വ്യക്തമാക്കി. നിലവിൽ ഇന്ത്യയിലെ എൽപിജി ഉൽപ്പാദനം പ്രതിദിനം 90 ഡിഎംടി എന്ന റെക്കോർഡ് നിലയിലാണ്. ആഭ്യന്തര വിപണിയിൽ ക്ഷാമം ഒഴിവാക്കുന്നതിനായി കുറഞ്ഞത് 30 ദിവസത്തെ കരുതൽ ശേഖരം ഉറപ്പുവരുത്താൻ എണ്ണ കമ്പനികൾക്ക് കേന്ദ്രം കർശന നിർദ്ദേശം നൽകിയിട്ടുണ്ട്.
രാജ്യത്തെ നിലവിലെ പ്രതിദിന എൽപിജി ആവശ്യകത 72,000 മെട്രിക് ടണ്ണാണ്. ഇതിൽ 50,000 മുതൽ 52,000 മെട്രിക് ടൺ വരെ ആഭ്യന്തര റിഫൈനറികളിലൂടെയാണ് ഉൽപ്പാദിപ്പിക്കുന്നത്. ഈ സാഹചര്യത്തിൽ എൽപിജിയുടെ അനധികൃത വിൽപന തടയുന്നതിനായി എൻഫോഴ്സ്മെന്റ് ഏജൻസികൾ പരിശോധനകൾ ശക്തമാക്കിയിരിക്കുകയാണ്. ഇതിന്റെ ഭാഗമായി കഴിഞ്ഞ നാല് ദിവസത്തിനുള്ളിൽ രാജ്യവ്യാപകമായി 6,500 ഓളം റെയ്ഡുകൾ നടന്നതായാണ് വിവരം. ഗുരുവായൂർ ഉൾപ്പെടെയുള്ള പ്രദേശങ്ങളിലെ ഹോട്ടൽ-റെസ്റ്റോറന്റ് മേഖലകളിൽ ഈ വിലവർദ്ധനവ് വലിയ സാമ്പത്തിക പ്രത്യാഘാതങ്ങൾ സൃഷ്ടിക്കുമെന്നാണ് വിലയിരുത്തൽ.
