ഒറിഗൺ: ഇന്ത്യൻ ജാവലിൻ ത്രോയിൽ പുതിയ പ്രതീക്ഷയായി മാറുകയാണ് പത്തൊൻപതുകാരൻ ആശിഷ് യാദവ്. ഒറിഗണിൽ നടന്ന ലോക അണ്ടർ-20 ചാമ്പ്യൻഷിപ്പിലെ പുരുഷ ജാവലിൻ ത്രോയിൽ വെള്ളിമെഡൽ സ്വന്തമാക്കിയാണ് താരം ചരിത്രനേട്ടം കുറിച്ചത്. 74.09 മീറ്റർ ദൂരം കണ്ടെത്തിയ ആശിഷ്, ദക്ഷിണാഫ്രിക്കയുടെ ജാൻ-ഹെൻഡ്രിക് ഹെയ്മാൻസിന് പിന്നിലായാണ് രണ്ടാം സ്ഥാനത്തെത്തിയത്. 80.50 മീറ്റർ ദൂരം പിന്നിട്ടാണ് ഹെയ്മാൻസ് സ്വർണം നേടിയത്. ഡൊമിനിക്കയുടെ ആഡിസൺ ജെയിംസ് 73.89 മീറ്റർ ദൂരത്തോടെ വെങ്കല മെഡൽ സ്വന്തമാക്കി.
നീരജ് ചോപ്ര ലോക അണ്ടർ-20 ചാമ്പ്യൻഷിപ്പിൽ ജാവലിൻ ത്രോയിൽ സ്വർണം നേടി പത്ത് വർഷത്തിന് ശേഷമാണ് മറ്റൊരു ഇന്ത്യൻ പുരുഷ താരം ഈ വേദിയിൽ മെഡൽ നേടുന്നത്. 2016-ൽ ബൈഡ്ഗോഷിൽ നീരജ് നേടിയ സ്വർണത്തിന് ശേഷം, ലോക അണ്ടർ-20 ജാവലിൻ പോഡിയത്തിലെത്തുന്ന രണ്ടാമത്തെ ഇന്ത്യൻ താരമാണ് ആശിഷ്. മത്സരത്തിന്റെ തുടക്കത്തിൽ ആശിഷിന് കാര്യങ്ങൾ അനുകൂലമായിരുന്നില്ല. ആദ്യ ശ്രമത്തിൽ 69.96 മീറ്റർ മാത്രമാണ് കണ്ടെത്താനായത്. രണ്ടാം ശ്രമം ഫൗളായതോടെ സമ്മർദ്ദത്തിലായ താരം, നിർണായകമായ മൂന്നാം ശ്രമത്തിലാണ് 74.09 മീറ്റർ എറിഞ്ഞ് രണ്ടാം സ്ഥാനത്തേക്ക് കുതിച്ചുയർന്നത്.
തുടർന്ന് 72.31, 70.62, 67.98 മീറ്റർ എന്നിങ്ങനെയായിരുന്നു താരത്തിന്റെ പ്രകടനം. തന്റെ വ്യക്തിഗതവും ഈ സീസണിലെയും മികച്ച ദൂരമായ 74.49 മീറ്ററിന് തൊട്ടടുത്തെത്താൻ താരത്തിന് സാധിച്ചത് വലിയ നേട്ടമായി. യോഗ്യതാ റൗണ്ടിലും മികച്ച പ്രകടനമാണ് ആശിഷ് പുറത്തെടുത്തത്. ഗ്രൂപ്പ് എയിൽ 69.87 മീറ്റർ എറിഞ്ഞ് ഒന്നാമതെത്തിയ താരം, ആകെ റാങ്കിംഗിലും ഹെയ്മാൻസിന് പിന്നിൽ രണ്ടാം സ്ഥാനത്തായിരുന്നു. ഇന്ത്യയുടെ മറ്റൊരു താരമായ ടി. ധരണീധരൻ ഫൈനലിൽ 72.35 മീറ്റർ കണ്ടെത്തി ആറാം സ്ഥാനത്ത് മത്സരം പൂർത്തിയാക്കി. നീരജ് ചോപ്ര 2016-ൽ സ്ഥാപിച്ച 86.48 മീറ്റർ ലോക അണ്ടർ-20 റെക്കോർഡ് ഇന്നും ചാമ്പ്യൻഷിപ്പ് റെക്കോർഡായി തുടരുമ്പോൾ, പുതിയ താരങ്ങളുടെ ഉദയം ഇന്ത്യൻ ജാവലിൻ ത്രോയ്ക്ക് വൻ പ്രതീക്ഷയാണ് നൽകുന്നത്.
