കൊച്ചി: മുത്തൂറ്റ് ഫിനാന്സ് ലിമിറ്റഡിന്റെ പുതിയ മാനേജിംഗ് ഡയറക്ടറായി അലക്സാണ്ടര് ജോര്ജിനെ നിയമിക്കാന് ഡയറക്ടര് ബോര്ഡ് ശുപാര്ശ ചെയ്തു. ഈ വര്ഷം ഒക്ടോബര് ഒന്നു മുതല് നിയമനം പ്രാബല്യത്തില് വരും. കമ്പനിയുടെ വരാനിരിക്കുന്ന വാര്ഷിക പൊതുയോഗത്തില് ഓഹരി ഉടമകളുടെ അംഗീകാരത്തിന് വിധേയമായാകും ഈ മാറ്റം നടപ്പാക്കുക.
നിലവിലെ മാനേജിംഗ് ഡയറക്ടര് ജോര്ജ് അലക്സാണ്ടര് മുത്തൂറ്റ് ഇനി പുതിയ എക്സിക്യൂട്ടീവ് വൈസ് ചെയര്മാനായി ചുമതലയേല്ക്കും. കമ്പനിയുടെ അടുത്ത തലമുറ നേതൃത്വത്തിന് മാര്ഗനിര്ദേശം നല്കുന്നതിനൊപ്പം, സ്ഥാപനത്തിന്റെ തന്ത്രപരമായ വളര്ച്ചയ്ക്കും അദ്ദേഹം നേതൃത്വം നല്കും. ഡിജിറ്റല് ബാങ്കിംഗ്, സാങ്കേതികവിദ്യ, ഉപഭോക്തൃ അനുഭവം, മാര്ക്കറ്റിംഗ് എന്നീ മേഖലകളില് നിരവധി പരിവര്ത്തന സംരംഭങ്ങള്ക്ക് അലക്സാണ്ടര് ജോര്ജ് ഇതിനോടകം നേതൃത്വം നല്കിയിട്ടുണ്ട്. കൂടാതെ, കമ്പനിയുടെ എക്സിക്യൂട്ടീവ് ഡയറക്ടറും സി.ഒ.ഒയുമായ കെ.ആര്. ബിജിമോനെ പുതിയ ചീഫ് എക്സിക്യൂട്ടീവ് ഓഫീസറായി (സി.ഇ.ഒ) ഉയര്ത്താനും ബോര്ഡ് ശുപാര്ശ ചെയ്തിട്ടുണ്ട്.
ശക്തമായ ബിസിനസ് വളര്ച്ച രേഖപ്പെടുത്തുന്നതിനിടയിലാണ് മുത്തൂറ്റ് ഫിനാന്സില് ഈ നേതൃമാറ്റം നടക്കുന്നത്. 2026 ജൂണ് 30 വരെയുള്ള കണക്കുപ്രകാരം കമ്പനിയുടെ കണ്സോളിഡേറ്റഡ് ലോണ് അസറ്റ് 1.91 ലക്ഷം കോടി രൂപ കവിഞ്ഞിട്ടുണ്ട്. ഇതിനുപുറമെ, 2025-26 സാമ്പത്തിക വര്ഷത്തില് 106.06 ബില്യണ് രൂപ അറ്റാദായം നേടി കമ്പനി ചരിത്രപരമായ നാഴികക്കല്ലും പിന്നിട്ടു.
