തൃശ്ശൂർ: മണ്ണുത്തി-വടക്കഞ്ചേരി ദേശീയപാതയിലുണ്ടായ വാഹനാപകടത്തിൽ രണ്ടുപേർ മരിച്ചു. പെരിഞ്ഞനം സ്വദേശികളായ രാജലക്ഷ്മി (75), വിലാസിനി (78) എന്നിവരാണ് മരിച്ചത്. നിയന്ത്രണം വിട്ട കാർ നീർപ്പാലത്തിന്റെ തൂണിലിടിച്ച് അപകടമുണ്ടായി. ഒരു കുടുംബത്തിലെ മൂന്നുപേർക്ക് ഗുരുതരമായി പരിക്കേറ്റു.
ഞായറാഴ്ച വൈകുന്നേരം ആറുമണിയോടെ ചുവന്നമണ്ണിലായിരുന്നു അപകടം. പാലക്കാട് തത്തമംഗലത്ത് നിന്ന് മടങ്ങുകയായിരുന്നു പെരിഞ്ഞനം സ്വദേശികളായ അഞ്ചംഗ സംഘം. റോഡിന് നടുവിലുള്ള കോൺക്രീറ്റ് ബാരിക്കേഡിലിടിച്ച കാർ 30 മീറ്ററോളം മുന്നോട്ട് നീങ്ങി നീർപ്പാലത്തിന്റെ തൂണിലിടിച്ച് നിൽക്കുകയായിരുന്നു. റോഡിലെ സൂചന ബോർഡും തകർത്താണ് വാഹനം പാഞ്ഞുകയറിയത്. കാർ ഓടിച്ചിരുന്ന ശ്രീഹരി, പിതാവ് ബാബു, മാതാവ് ഷീജ എന്നിവരെ അതീവ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു.
അപകടത്തിന് പിന്നാലെ പ്രദേശത്ത് വലിയ തോതിലുള്ള ജനരോഷം ഉയർന്നു. ദേശീയപാതയിലെ ‘യു ടേൺ’ അടച്ചുകെട്ടിയത് കാരണം അപകടസ്ഥലത്തേക്ക് ആംബുലൻസിന് യഥാസമയം എത്തിച്ചേരാൻ കഴിഞ്ഞില്ലെന്ന് നാട്ടുകാർ ആരോപിച്ചു. ഏകദേശം 20 മിനിറ്റോളം വൈകിയാണ് ആംബുലൻസ് എത്തിയത്. ജീവൻ രക്ഷിക്കാനുള്ള നിർണ്ണായകമായ സമയം നഷ്ടപ്പെട്ടതിൽ പ്രകോപിതരായ നാട്ടുകാർ റോഡിൽ തടിച്ചുകൂടി പ്രതിഷേധിച്ചു. അശാസ്ത്രീയമായ റോഡ് നിർമ്മാണവും ട്രാഫിക് ക്രമീകരണങ്ങളുമാണ് ഇത്തരം അപകടങ്ങൾക്കും രക്ഷാപ്രവർത്തനത്തിലെ കാലതാമസത്തിനും കാരണമാകുന്നതെന്ന് പ്രതിഷേധക്കാർ ചൂണ്ടിക്കാട്ടി. പോലീസെത്തി ഗതാഗതം പുനഃസ്ഥാപിക്കുകയും നാട്ടുകാരെ ശാന്തരാക്കുകയും ചെയ്തു. സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്.
