തിരുവനന്തപുരം: ജൂൺ മാസത്തെ ക്ഷേമ പെൻഷൻ വിതരണം നാളെ മുതൽ ആരംഭിക്കുമെന്ന് ധനകാര്യ വകുപ്പ് അറിയിച്ചു. ഇതുമായി ബന്ധപ്പെട്ട ഔദ്യോഗിക ഉത്തരവ് സർക്കാർ പുറപ്പെടുവിച്ചു. അടുത്ത മാസം മൂന്നാം തീയതിക്കുള്ളിൽ പെൻഷൻ വിതരണം പൂർത്തിയാക്കണമെന്നാണ് കർശന നിർദേശം. കഴിഞ്ഞ മെയ് മാസത്തെ പെൻഷൻ വിതരണം പൂർത്തിയായതിന് പിന്നാലെയാണ് ജൂൺ മാസത്തെ പെൻഷൻ വിതരണത്തിനായി തുക അനുവദിച്ച് സർക്കാർ ഉത്തരവിറക്കിയിരിക്കുന്നത്.
സംസ്ഥാനത്തെ വിവിധ വിഭാഗങ്ങളിലായി പെൻഷൻ കൈപ്പറ്റുന്ന ലക്ഷക്കണക്കിന് ഗുണഭോക്താക്കളുടെ കൈകളിലേക്ക് തുക എത്രയും വേഗം എത്തിക്കുകയെന്ന ലക്ഷ്യത്തോടെയാണ് നടപടികൾ വേഗത്തിലാക്കുന്നത്. കർഷകത്തൊഴിലാളി പെൻഷൻ, ഇന്ദിരാഗാന്ധി ദേശീയ വാർധക്യകാല പെൻഷൻ, ഭിന്നശേഷി പെൻഷൻ, അവിവാഹിതകൾക്കുള്ള പെൻഷൻ, വിധവാ പെൻഷൻ എന്നിവയാണ് മുൻഗണനാ ക്രമത്തിൽ വിതരണം ചെയ്യുക.
സംസ്ഥാനത്തൊട്ടാകെ 51,70,015 ഗുണഭോക്താക്കൾക്കാണ് ഈ മാസം ക്ഷേമ പെൻഷൻ ലഭിക്കുന്നത്. ഗുണഭോക്താക്കളുടെ താൽപ്പര്യവും സൗകര്യവും പരിഗണിച്ച് രണ്ട് വ്യത്യസ്ത വിതരണ ശൃംഖലകൾ വഴിയാണ് തുക ലഭ്യമാക്കുന്നത്. ഗുരുവായൂർ ഉൾപ്പെടെയുള്ള നഗരസഭകളിലും ഗ്രാമപഞ്ചായത്തുകളിലും ഈ നിർദേശം ബാധകമാകും. പെൻഷൻ തുക വിതരണം കൃത്യസമയത്ത് പൂർത്തിയാക്കാൻ ബന്ധപ്പെട്ട ഉദ്യോഗസ്ഥർക്ക് സർക്കാർ നിർദേശം നൽകിയിട്ടുണ്ട്.
