മുംബൈ: ആഭ്യന്തര ഓഹരി വിപണി തിങ്കളാഴ്ച ശക്തമായ നേട്ടത്തോടെ വ്യാപാരം ആരംഭിച്ചു. ആഗോള വിപണികളിലെ അനുകൂല സൂചനകളും ക്രൂഡ് ഓയില് വിലയിലുണ്ടായ കുത്തനെയുള്ള ഇടിവുമാണ് വിപണിയില് വലിയ കുതിച്ചുചാട്ടത്തിന് വഴിയൊരുക്കിയത്. രാവിലെ 9:36-ലെ വിവരമനുസരിച്ച് ബി.എസ്.ഇ സെന്സെക്സ് 519.05 പോയിന്റ് അഥവാ 0.66 ശതമാനം ഉയർന്ന് 78,613.69 എന്ന നിലവാരത്തിലെത്തി. എന്.എസ്.ഇ നിഫ്റ്റി 172.95 പോയിന്റ് അഥവാ 0.71 ശതമാനം നേട്ടത്തോടെ 24,556.55 എന്ന സുപ്രധാന നിലവാരത്തിലാണ് വ്യാപാരം നടത്തുന്നത്. വിപണിയില് 2,544 ഓഹരികള് നേട്ടത്തിലും 704 ഓഹരികള് നഷ്ടത്തിലുമാണ്.
വിപണി മുന്നേറ്റത്തിന്റെ പ്രധാന ചാലകശക്തി ക്രൂഡ് ഓയില് വിലയിലെ കുറവാണ്. പശ്ചിമേഷ്യന് സംഘര്ഷങ്ങളിലെ അയവും യു.എസ്-ഇറാന് ചര്ച്ചകളെക്കുറിച്ചുള്ള സൂചനകളും കാരണം ബ്രെന്റ് ക്രൂഡ് ഓയില് വില അഞ്ച് ശതമാനത്തോളം ഇടിഞ്ഞ് ബാരലിന് 83.5 ഡോളറായി താഴ്ന്നു. എണ്ണ ഇറക്കുമതി ചെയ്യുന്ന ഇന്ത്യയെ സംബന്ധിച്ചിടത്തോളം ക്രൂഡ് ഓയില് വിലയിലെ ഈ കുറവ് പണപ്പെരുപ്പം, വ്യാപാര കമ്മി, കമ്പനികളുടെ ഉല്പ്പാദനച്ചെലവ് എന്നിവ കുറയ്ക്കുന്നതിന് സഹായകമാകും. വിദേശ നിക്ഷേപകരുടെ തുടര്ച്ചയായ വാങ്ങല് താല്പ്പര്യവും ബോണ്ട് യീല്ഡുകളിലെ ഇടിവും നിക്ഷേപകരുടെ ആത്മവിശ്വാസം വര്ദ്ധിപ്പിച്ചിട്ടുണ്ട്. ഒന്നാം പാദഫലങ്ങളിലെ ശുഭപ്രതീക്ഷകളും ബെഞ്ച്മാര്ക്ക് സൂചികകളുടെ കുതിപ്പിന് പിന്തുണയേകുന്നു.
സാങ്കേതികമായി നിഫ്റ്റി 50 നിലവില് മികച്ച ബുള് ട്രെന്ഡിലാണ് വ്യാപാരം തുടരുന്നത്. 24,373 എന്ന മുന് പ്രതിരോധ നിലവാരം ഭേദിച്ച സൂചിക നിലവില് 24,400-24,550 ഗ്യാപ്പ്-അപ്പ് മേഖലയ്ക്കുള്ളില് കണ്സോളിഡേറ്റ് ചെയ്യുകയാണ്. 24,373-24,400 സപ്പോര്ട്ട് സോണിന് മുകളില് തുടരുന്നിടത്തോളം കാലം വിപണിയിലെ വാങ്ങല് താല്പ്പര്യം ശക്തമായിരിക്കും. മുകളിലേക്ക് 24,592 ലെവല് തല്ക്ഷണ പ്രതിരോധമായി തുടരുമ്പോള്, ഇത് മറികടന്നാല് 24,700-24,747 നിലവാരത്തിലേക്ക് സൂചിക നീങ്ങാന് സാധ്യതയുണ്ട്. അതേസമയം, 24,373 എന്ന സപ്പോര്ട്ടിന് താഴേക്ക് വിപണി പതിച്ചാല് ഹ്രസ്വകാല സാങ്കേതിക ഘടന ബലഹീനമാകാനും സാധ്യതയുണ്ട്. എഫ്.എം.സി.ജി, മെറ്റല്, ടെലികോം, പി.എസ്.യു ബാങ്ക് തുടങ്ങിയ മേഖലകളിലെ മുന്നേറ്റം വിപണിക്ക് കരുത്തേകുമ്പോള്, ക്രൂഡ് വില, ആഗോള സൂചനകള്, എഫ്.ഐ.ഐ നിക്ഷേപം എന്നിവയായിരിക്കും വരും ദിവസങ്ങളില് വിപണിയുടെ ദിശ നിര്ണ്ണയിക്കുക
