ഗുരുവായൂർ: വരും നാളുകളിൽ സ്വർണ്ണവിലയിൽ വലിയ രീതിയിലുള്ള ചാഞ്ചാട്ടങ്ങൾക്ക് സാധ്യതയുണ്ടെന്ന് ടാറ്റാ മ്യൂച്വൽ ഫണ്ടിന്റെ പുതിയ റിപ്പോർട്ട് വ്യക്തമാക്കുന്നു. യുഎസ് ഡോളറിന്റെ കരുത്ത്, ഉയർന്ന പലിശനിരക്കുകൾ, യുഎസ് ബോണ്ട് യീൽഡിലെ വർദ്ധനവ് എന്നിവയാണ് വരും മാസങ്ങളിൽ സ്വർണ്ണവിലയെ സ്വാധീനിക്കുന്ന പ്രധാന ഘടകങ്ങൾ. ഇത് വിലയിൽ താത്കാലികമായ മന്ദഗതിക്കോ കൺസോളിഡേഷനോ കാരണമായേക്കാം. ആഗോള ഭൗമരാഷ്ട്രീയ സാഹചര്യങ്ങൾ വിലയിരുത്തുമ്പോൾ, സ്വർണ്ണവിലയിൽ ഇരുവശങ്ങളിലേക്കും അഞ്ച് ശതമാനം വരെ വ്യതിയാനങ്ങൾ സംഭവിക്കാൻ സാധ്യതയുണ്ടെന്ന് റിപ്പോർട്ട് ചൂണ്ടിക്കാട്ടുന്നു. എന്നിരുന്നാലും, ഈ മാറ്റങ്ങൾ ദീർഘകാല നിക്ഷേപകർക്ക് മികച്ച അവസരമായി ഉപയോഗപ്പെടുത്താമെന്നും റിപ്പോർട്ടിൽ പറയുന്നു.
ഇന്ത്യൻ നിക്ഷേപകരെ സംബന്ധിച്ചിടത്തോളം ആശ്വാസകരമായ വിവരങ്ങളാണ് റിപ്പോർട്ടിലുള്ളത്. അന്താരാഷ്ട്ര വിപണിയിൽ സ്വർണ്ണവില കുറഞ്ഞാലും അത് ഇന്ത്യൻ വിപണിയെ വലിയ തോതിൽ ബാധിക്കില്ല. ഡോളറിനെ അപേക്ഷിച്ച് രൂപയുടെ മൂല്യത്തിൽ ഉണ്ടാകുന്ന ഇടിവ് ആഭ്യന്തര വിപണിയിൽ സ്വർണ്ണവിലയിൽ വലിയ തകർച്ചയുണ്ടാകാതെ പിടിച്ചുനിർത്താൻ സഹായിക്കും. അതിനാൽ, സ്വർണ്ണത്തിൽ ഒറ്റത്തവണയായി വലിയ തുക നിക്ഷേപിക്കുന്നതിന് പകരം, കൃത്യമായ ഇടവേളകളിൽ ഘട്ടംഘട്ടമായി നിക്ഷേപം നടത്തുന്ന സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ (SIP) രീതി സ്വീകരിക്കുന്നതാണ് നിക്ഷേപകർക്ക് കൂടുതൽ അനുയോജ്യമെന്ന് വിദഗ്ദ്ധർ നിർദ്ദേശിക്കുന്നു.
വെള്ളി വിലയെ സംബന്ധിച്ചും സുപ്രധാന നിരീക്ഷണങ്ങൾ റിപ്പോർട്ടിലുണ്ട്. ആഗോള സാമ്പത്തിക മാന്ദ്യവും സോളാർ ഇൻസ്റ്റലേഷനുകളിലെ താൽക്കാലിക കുറവും കാരണം ഹ്രസ്വകാലയളവിൽ വെള്ളി വിലയിൽ നേരിയ ഇടിവുണ്ടായേക്കാം. എന്നാൽ, ദീർഘകാലാടിസ്ഥാനത്തിൽ വെള്ളിയുടെ ഡിമാൻഡും സപ്ലൈയും തമ്മിലുള്ള അസന്തുലിതാവസ്ഥ വലിയ വിലവർദ്ധനവിന് വഴിയൊരുക്കും. തുടർച്ചയായ ആറാം വർഷമാണ് വെള്ളിയുടെ ആഗോള ഡിമാൻഡ് സപ്ലൈയെ മറികടക്കുന്നത്. സോളാർ എനർജി, ഇലക്ട്രിക് വാഹനങ്ങൾ, 5ജി ഇൻഫ്രാസ്ട്രക്ചർ, സെമികണ്ടക്ടറുകൾ തുടങ്ങിയ അത്യാധുനിക വ്യവസായങ്ങളിൽ വെള്ളി അവിഭാജ്യ ഘടകമായി മാറിയിട്ടുണ്ട്. മേയ് മാസത്തിൽ കുറഞ്ഞ ഗോൾഡ്-സിൽവർ റേഷ്യോ ഇപ്പോൾ 62-ന് മുകളിലേക്ക് ഉയർന്നിട്ടുണ്ട്. ഇത് 68 വരെ എത്താൻ സാധ്യതയുള്ളതിനാൽ, ഹ്രസ്വകാലയളവിൽ സ്വർണ്ണം വെള്ളിയേക്കാൾ മികച്ച പ്രകടനം കാഴ്ചവെച്ചേക്കുമെന്നും ടാറ്റാ മ്യൂച്വൽ ഫണ്ട് റിപ്പോർട്ട് വിലയിരുത്തുന്നു.
