കൊച്ചി: ടാറ്റ മോട്ടോഴ്സ് തങ്ങളുടെ മുഴുവൻ പാസഞ്ചർ വാഹന നിരയിലും വില വർധിപ്പിക്കാൻ തീരുമാനിച്ചു. ഇവി (EV) സെഗ്മെന്റ് ഉൾപ്പെടെയുള്ള എല്ലാ മോഡലുകൾക്കും ഈ വില വർധന ബാധകമായിരിക്കും. പുതുക്കിയ നിരക്കുകൾ ജൂലൈ ഒന്നു മുതൽ പ്രാബല്യത്തിൽ വരുമെന്ന് കമ്പനി ഔദ്യോഗികമായി അറിയിച്ചു. മോഡലിനും വേരിയന്റിനും അനുസരിച്ച് വാഹനങ്ങളുടെ വിലയിൽ 1.5 ശതമാനം വരെ വർധനവാണ് പ്രതീക്ഷിക്കുന്നത്.
വർധിച്ചുവരുന്ന ഉൽപാദന ചെലവുകളും പണപ്പെരുപ്പവുമാണ് വില വർധിപ്പിക്കാൻ കമ്പനിയെ നിർബന്ധിതരാക്കിയത്. നിലവിലെ വിപണി സാഹചര്യം കണക്കിലെടുത്ത് നഷ്ടം ഭാഗികമായി നികത്തുന്നതിനാണ് ഈ തീരുമാനമെന്ന് ടാറ്റ മോട്ടോഴ്സ് വ്യക്തമാക്കി. വർധിച്ച ചെലവുകളുടെ ഒരു വലിയ ഭാഗം കമ്പനി തന്നെ വഹിച്ചുകൊണ്ട്, ഉപഭോക്താക്കൾക്ക് കുറഞ്ഞ തോതിലുള്ള ഭാരം മാത്രം നൽകുന്ന രീതിയിലാണ് വില ക്രമീകരിച്ചിരിക്കുന്നതെന്ന് അധികൃതർ അറിയിച്ചു. മാരുതി സുസുക്കി, ഹ്യൂണ്ടായ് തുടങ്ങിയ പ്രമുഖ കമ്പനികൾക്ക് പിന്നാലെയാണ് ടാറ്റയും വില വർധന പ്രഖ്യാപിച്ചത്.
പുതിയ തീരുമാനപ്രകാരം ടിയാഗോ, ടിഗോർ, ആൾട്രോസ്, പഞ്ച്, നെക്സോൺ, കർവ്, ഹാരിയർ, സഫാരി തുടങ്ങിയ ജനപ്രിയ മോഡലുകൾക്ക് വില കൂടും. ടിയാഗോ ഇവി, പഞ്ച് ഇവി, കർവ് ഇവി, നെക്സോൺ ഇവി തുടങ്ങിയ ഇലക്ട്രിക് വാഹനങ്ങളും ഇതിൽ ഉൾപ്പെടുന്നു. പ്രീമിയം വിഭാഗത്തിലുള്ള വാഹനങ്ങൾക്കായിരിക്കും ഏറ്റവും കൂടുതൽ വില വർധനവ് അനുഭവപ്പെടുക. വേരിയന്റുകൾ അടിസ്ഥാനമാക്കി 25,000 രൂപ മുതൽ പരമാവധി 45,000 രൂപ വരെ വില ഉയരാൻ സാധ്യതയുണ്ടെന്നാണ് വിപണിയിലെ സൂചനകൾ. വരാനിരിക്കുന്ന ഹാരിയർ ഇവി, സഫാരി ഇവി തുടങ്ങിയ മോഡലുകളുടെ വിലയിലും ഈ വർധന പ്രതിഫലിക്കും.
