തിരുവനന്തപുരം: കേരളത്തിലെ ടർഫ് ക്രിക്കറ്റിനെ മുഖ്യധാരയിലേക്ക് ഉയർത്തുന്നതിനായി കേരള ക്രിക്കറ്റ് അസോസിയേഷൻ (കെസിഎ) പുതിയ ചുവടുവെപ്പുമായി രംഗത്ത്. കേരള ക്രിക്കറ്റ് ലീഗിന്റെ (കെസിഎൽ) വൻ വിജയത്തിന് പിന്നാലെ, ക്രിക്കറ്റ് ആരാധകർക്കും അമേച്വർ ടീമുകൾക്കുമായി ‘കെസിഎൽ ഫാൻ ലീഗ്’ സംഘടിപ്പിക്കുമെന്ന് കെസിഎ അറിയിച്ചു. ടർഫ് ക്രിക്കറ്റിന് കൂടുതൽ അംഗീകാരവും മികച്ച മത്സരവേദിയും ഒരുക്കുകയാണ് ഈ ടൂർണമെന്റിലൂടെ ലക്ഷ്യമിടുന്നത്.
അത്യാധുനിക ടർഫുകളിൽ സംഘടിപ്പിക്കുന്ന ഈ ടൂർണമെന്റ് തിരുവനന്തപുരം, കൊല്ലം, ആലപ്പുഴ, കൊച്ചി, തൃശൂർ, കോഴിക്കോട് എന്നീ ജില്ലകളിലായാണ് നടക്കുന്നത്. ഓരോ ജില്ലയിൽ നിന്നും 32 ടീമുകൾക്ക് വീതം പങ്കെടുക്കാൻ അവസരമുണ്ടാകും. 11 അംഗങ്ങളുള്ള ടീമുകൾക്ക് സോഫ്റ്റ് ടെന്നീസ് ബോൾ ഉപയോഗിച്ച് നോക്കൗട്ട് ഫോർമാറ്റിലാണ് മത്സരിക്കേണ്ടത്. ജൂലൈ, ഓഗസ്റ്റ് മാസങ്ങളിലായി വിവിധ ജില്ലകളിൽ നടക്കുന്ന പ്രാഥമിക മത്സരങ്ങളിൽ വിജയിക്കുന്നവർ ചാമ്പ്യൻസ് റൗണ്ടിലേക്കും, തുടർന്ന് ഗ്രാൻഡ് ഫൈനലിലേക്കും യോഗ്യത നേടും.
ജില്ലാതല വിജയികൾക്ക് 25,000 രൂപയും ട്രോഫിയും, രണ്ടാം സ്ഥാനക്കാർക്ക് 15,000 രൂപയും സമ്മാനമായി ലഭിക്കും. സംസ്ഥാനതല ചാമ്പ്യൻമാർക്ക് 30,000 രൂപയും കെസിഎൽ ഫാൻ ലീഗ് ചാമ്പ്യൻസ് ട്രോഫിയും നൽകും. കൂടാതെ, പങ്കെടുക്കുന്ന എല്ലാ താരങ്ങൾക്കും കേരള ക്രിക്കറ്റ് അസോസിയേഷന്റെ സർട്ടിഫിക്കറ്റ് ലഭിക്കും. രജിസ്ട്രേഷൻ പൂർണ്ണമായും സൗജന്യമാണ്. തങ്ങളുടെ ടീമിനെ പരിചയപ്പെടുത്തുന്ന ഒരു മിനിറ്റ് ദൈർഘ്യമുള്ള വീഡിയോ സോഷ്യൽ മീഡിയയിൽ പങ്കുവെച്ച് ഔദ്യോഗിക പേജുകളെ ടാഗ് ചെയ്ത ശേഷം വാട്സ്ആപ്പ് വഴി ലിങ്ക് സമർപ്പിക്കണം. കേരളത്തിലെ ടർഫ് ക്രിക്കറ്റ് കളിക്കാർക്ക് വലിയ അവസരങ്ങൾ തുറന്നു നൽകുന്ന ഈ സംരംഭം സംസ്ഥാനത്തെ കായിക മേഖലയിൽ പുതിയൊരു ആവേശം പകരുമെന്നാണ് പ്രതീക്ഷിക്കുന്നത്.
