പുതിയ സാമ്പത്തിക വർഷം ആരംഭിക്കുന്ന ഏപ്രിൽ ഒന്നു മുതൽ രാജ്യത്ത് നിരവധി സുപ്രധാന സാമ്പത്തിക മാറ്റങ്ങൾ പ്രാബല്യത്തിൽ വരികയാണ്. ഇതിൽ ഏറ്റവും ശ്രദ്ധേയം പതിറ്റാണ്ടുകൾ പഴക്കമുള്ള 1961-ലെ ആദായനികുതി നിയമത്തിന് പകരം പുതിയ ‘ഇൻകം ടാക്സ് ആക്ട് 2025’ നിലവിൽ വരുന്നതാണ്. നികുതി, ബാങ്കിങ്, നിക്ഷേപം തുടങ്ങി സാധാരണക്കാരുടെ നിത്യജീവിതത്തെ ബാധിക്കുന്ന ഒട്ടേറെ മേഖലകളിൽ പുതിയ മാറ്റങ്ങൾ വരുന്നുണ്ട്.
ഏപ്രിൽ ഒന്ന് മുതലുള്ള പ്രധാന മാറ്റങ്ങൾ താഴെ പറയുന്നവയാണ്:
- ആദായ നികുതിയും ഫോമുകളും: നികുതി നിയമങ്ങളും ഫോമുകളും ലഘൂകരിച്ചിട്ടുണ്ട്. ഫോമുകളുടെ എണ്ണം 511-ൽ നിന്ന് 333 ആയി കുറച്ചു. ഉദാഹരണത്തിന്, ശമ്പളക്കാർക്കുള്ള പഴയ ഫോം 16 ഇനി മുതൽ ഫോം 130 ആയി മാറും. വാർഷിക നികുതി വിവരങ്ങൾക്കുള്ള ഫോം 26AS-ന് പകരം ഫോം 168 ആകും ഉപയോഗിക്കുക.
- പാൻ കാർഡ് നിബന്ധനകൾ കർശനമാക്കി: പാൻ കാർഡ് എടുക്കുന്നതിനും പുതുക്കുന്നതിനും ജനനത്തീയതി തെളിയിക്കാൻ ഇനി മുതൽ ആധാർ കാർഡ് മാത്രം പോരാ, പകരം പത്താം ക്ലാസ് സർട്ടിഫിക്കറ്റോ പാസ്പോർട്ടോ വോട്ടർ ഐഡിയോ വേണ്ടിവരും. പാനിലെയും ആധാറിലെയും പേര് കൃത്യമായി ഒന്നായിരിക്കണം. കൂടാതെ 10 ലക്ഷത്തിൽ കൂടുതലുള്ള ക്യാഷ് ഡെപ്പോസിറ്റുകൾക്കും മറ്റ് വലിയ ഇടപാടുകൾക്കും പാൻ കാർഡ് നിർബന്ധമാക്കിയിട്ടുണ്ട്.
- ബാങ്കിംഗ് രംഗം കൂടുതൽ സുരക്ഷിതമാക്കുന്നു: ഡിജിറ്റൽ തട്ടിപ്പുകൾ തടയുന്നതിനായി ആർബിഐ ടു-ഫാക്ടർ ഓതന്റിക്കേഷൻ (2FA) നിർബന്ധമാക്കി. അതായത്, ഒടിപിക്ക് പുറമെ പാസ്വേഡോ ബയോമെട്രിക് വിവരങ്ങളോ നൽകിയാൽ മാത്രമേ ഇനി പണമിടപാട് സാധ്യമാകൂ. കൂടാതെ എടിഎം പിൻവലിക്കൽ പരിധികളിലും സൗജന്യ പരിധിക്ക് ശേഷമുള്ള ചാർജുകളിലും ചില ബാങ്കുകൾ മാറ്റം വരുത്തിയിട്ടുണ്ട്.
- ശമ്പളക്കാർക്ക് കൂടുതൽ ആശ്വാസം: എച്ച്ആർഎ (HRA) വഴി 50% നികുതി ഇളവ് ലഭിക്കുന്ന നഗരങ്ങളുടെ പട്ടികയിൽ ബെംഗളൂരു, ഹൈദരാബാദ്, പുണെ തുടങ്ങിയ നഗരങ്ങളെ കൂടി ഉൾപ്പെടുത്തി. കുട്ടികളുടെ വിദ്യാഭ്യാസ അലവൻസ് പ്രതിമാസം 3,000 രൂപയായും ഹോസ്റ്റൽ ഫീസ് 9,000 രൂപയായും ഉയർത്തി. മീൽ കാർഡുകൾക്കുള്ള പ്രതിദിന നികുതിരഹിത പരിധി 50 രൂപയിൽ നിന്ന് 200 രൂപയാക്കി വർദ്ധിപ്പിച്ചു.
- യാത്ര, നിക്ഷേപം: ട്രെയിൻ യാത്രയ്ക്ക് എട്ട് മണിക്കൂർ മുൻപ് ടിക്കറ്റ് റദ്ദാക്കിയാൽ ഇനി റീഫണ്ട് ലഭിക്കില്ല (നേരത്തെ ഇത് 4 മണിക്കൂർ ആയിരുന്നു). ഫാസ്ടാഗ് വാർഷിക പാസ് നിരക്ക് വർദ്ധിപ്പിച്ചു. നിക്ഷേപ രംഗത്ത്, ഫ്യൂച്ചർ ട്രേഡിംഗിലെ എസ്ടിടി (STT) നിരക്കുകൾ വർദ്ധിപ്പിച്ചു. കൂടാതെ സ്റ്റോക്ക് എക്സ്ചേഞ്ചുകൾ വഴി വാങ്ങുന്ന സോവറിൻ ഗോൾഡ് ബോണ്ടുകൾക്കും, കമ്പനികൾ ഓഹരികൾ തിരികെ വാങ്ങുമ്പോൾ (Buyback) ലഭിക്കുന്ന തുകയ്ക്കും മൂലധന നേട്ട നികുതി ബാധകമാകും.
