ന്യൂഡൽഹി: കൃത്രിമ ബുദ്ധി (എഐ) സാങ്കേതികവിദ്യയുടെ സഹായത്തോടെ ലോകത്തിലെ ഏറ്റവും ആധുനികമായ അതിർത്തി സുരക്ഷാ സംവിധാനം ഇന്ത്യയിൽ നടപ്പാക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ പ്രഖ്യാപിച്ചു. രാജ്യത്തിന്റെ അതിർത്തികളിലൂടെയുള്ള അനധികൃത നുഴഞ്ഞുകയറ്റം പൂർണമായും തടയുക എന്നതാണ് ഈ പദ്ധതിയിലൂടെ സർക്കാർ ലക്ഷ്യമിടുന്നത്.
അതിർത്തി ജില്ലകളിലെ പോലീസ് സൂപ്രണ്ടുമാരുടെ ദേശീയ സമ്മേളനത്തിൽ സംസാരിക്കവെയാണ് അമിത് ഷാ ‘സ്മാർട്ട് ബോർഡർ’ പദ്ധതിയുടെ രൂപരേഖ വിശദീകരിച്ചത്. അതിർത്തി സുരക്ഷയെ നിലവിലെ പ്രതികരണാത്മക സംവിധാനത്തിൽ നിന്ന് മാറി, മുൻകരുതൽ അടിസ്ഥാനത്തിലുള്ള സമഗ്രമായ സുരക്ഷാ സംവിധാനമാക്കി മാറ്റാനാണ് തീരുമാനം. കേന്ദ്ര സർക്കാർ, അതിർത്തി സുരക്ഷാ സേനകൾ, സംസ്ഥാന-ജില്ലാ ഭരണകൂടങ്ങൾ, അതിർത്തി ഗ്രാമങ്ങളിലെ ജനങ്ങൾ എന്നിവരുടെ ഏകോപനത്തോടെ ശക്തമായ ‘ക്വാഡ്രാംഗുലർ സെക്യൂരിറ്റി ഗ്രിഡ്’ രൂപീകരിക്കുമെന്ന് അദ്ദേഹം വ്യക്തമാക്കി.
ഡ്രോണുകൾ, അത്യാധുനിക റഡാറുകൾ, നിരീക്ഷണ ക്യാമറകൾ, എഐ അധിഷ്ഠിത സാങ്കേതികവിദ്യകൾ എന്നിവ പദ്ധതിയുടെ ഭാഗമായി വിന്യസിക്കും. ഇത് അതിർത്തി സംരക്ഷണം കൂടുതൽ കാര്യക്ഷമമാക്കുന്നതിനൊപ്പം നുഴഞ്ഞുകയറ്റം, മയക്കുമരുന്ന് കടത്ത്, ഡ്രോൺ ഭീഷണി, മറ്റ് അതിർത്തി കുറ്റകൃത്യങ്ങൾ എന്നിവ ഫലപ്രദമായി ചെറുക്കാൻ സഹായിക്കും. വരും വർഷങ്ങളിൽ ഇന്ത്യയുടെ അതിർത്തി സുരക്ഷാ സംവിധാനം ലോകത്തിലെ ഏറ്റവും ആധുനിക നിലവാരത്തിലേക്ക് ഉയരുമെന്നും അദ്ദേഹം കൂട്ടിച്ചേർത്തു.
