മുംബൈ: 2026-27 ആഭ്യന്തര ക്രിക്കറ്റ് സീസണിന് മുന്നോടിയായി മത്സര ചട്ടങ്ങളിൽ സമഗ്ര മാറ്റങ്ങൾ വരുത്താൻ ബിസിസിഐ തീരുമാനിച്ചു. അടുത്ത മാസം ആരംഭിക്കുന്ന ദുലീപ് ട്രോഫി മുതൽ പുതിയ നിബന്ധനകൾ പ്രാബല്യത്തിൽ വരും. ബൗളിംഗ് നിയമങ്ങൾ, വിക്കറ്റ് കീപ്പിങ്, കോച്ചിങ് സംവിധാനങ്ങൾ എന്നിവയുൾപ്പെടെയുള്ള മേഖലകളിൽ വരുത്തിയ ഈ മാറ്റങ്ങൾ സംബന്ധിച്ച സർക്കുലർ എല്ലാ സംസ്ഥാന ക്രിക്കറ്റ് അസോസിയേഷനുകൾക്കും ബിസിസിഐ കൈമാറിയിട്ടുണ്ട്.
പുതിയ ചട്ടങ്ങളിൽ ഏറ്റവും ശ്രദ്ധേയമായത് മനഃപൂർവം നോ-ബോൾ എറിയുന്ന ബൗളർമാർക്കെതിരായ കടുത്ത നടപടിയാണ്. നിലവിൽ ഇത്തരം സാഹചര്യങ്ങളിൽ ആ ഇന്നിങ്സിൽ മാത്രമായിരുന്നു താരത്തിന് സസ്പെൻഷൻ ഏർപ്പെടുത്തിയിരുന്നത്. എന്നാൽ പുതിയ നിയമപ്രകാരം, മനഃപൂർവം നോ-ബോൾ എറിഞ്ഞതായി ഓൺ-ഫീൽഡ് അമ്പയർമാർ കണ്ടെത്തിയാൽ മത്സരത്തിന്റെ ശേഷിക്കുന്ന മുഴുവൻ ദിവസങ്ങളിലും താരത്തിന് കളിക്കാനാകില്ല. കൂടാതെ, അവസാന ഓവറിനിടെ വിക്കറ്റ് വീണാലും ഓവർ പൂർത്തിയാക്കിയ ശേഷമേ അന്നത്തെ കളി അവസാനിപ്പിക്കൂ എന്നതും പുതിയ മാറ്റമാണ്. മത്സരത്തിന്റെ അവസാന ഘട്ടങ്ങളിൽ ടീമുകൾ തന്ത്രപരമായി ഉപയോഗിച്ചിരുന്ന ഇന്നിങ്സ് ഡിക്ലറേഷനും ഇന്നിങ്സ് വിട്ടുകൊടുക്കലിനും പുതിയ ചട്ടങ്ങളോടെ വിരാമമാകും.
ആഭ്യന്തര ഏകദിന മത്സരങ്ങളിൽ ഹൈഡ്രേഷൻ ബ്രേക്ക് സമയത്ത് മുഖ്യപരിശീലകർക്ക് മൈതാനത്ത് പ്രവേശിച്ച് കളിക്കാർക്ക് നിർദേശങ്ങൾ നൽകാൻ ബിസിസിഐ അനുമതി നൽകി. വിക്കറ്റ് കീപ്പർമാർക്കും ആശ്വാസം നൽകുന്നതാണ് മറ്റൊരു നിയമം. ഇതുവരെ ബൗളർ റൺ-അപ്പ് ആരംഭിക്കുമ്പോൾ മുതൽ ഗ്ലൗസുകൾ സ്റ്റമ്പിന് പിന്നിലായിരിക്കണമെന്നായിരുന്നു ചട്ടം. എന്നാൽ, ഇനി ബൗളർ പന്തെറിയുന്ന നിമിഷത്തിൽ മാത്രം കീപ്പറുടെ ഗ്ലൗസുകൾ സ്റ്റമ്പിന് പിന്നിലായാൽ മതിയാകും. ദുലീപ് ട്രോഫിയിലൂടെ പരീക്ഷിച്ച ശേഷം ഈ നിയമങ്ങൾ ആഭ്യന്തര സീസണിലെ മറ്റ് ടൂർണമെന്റുകളിലും നടപ്പാക്കും. ഈ മാറ്റങ്ങൾ ആഭ്യന്തര ക്രിക്കറ്റിലെ മത്സരക്രമത്തിലും തന്ത്രങ്ങളിലും വലിയ മാറ്റങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്.
