മുംബൈ: സിംബാബ്വെക്കെതിരായ ടി20 പരമ്പരയ്ക്കുള്ള ഇന്ത്യന് ടീമില് നിന്ന് സഞ്ജു സാംസണിനെ ഒഴിവാക്കിയ തീരുമാനത്തിനെതിരെ രൂക്ഷവിമര്ശനവുമായി പ്രമുഖ ക്രിക്കറ്റ് കമന്റേറ്റര് ഹര്ഷ ഭോഗ്ലെ. താരത്തിന് ‘വിശ്രമം അനുവദിച്ചു’ എന്ന ഔദ്യോഗിക വിശദീകരണം വിശ്വാസയോഗ്യമല്ലെന്നും, യഥാർത്ഥത്തിൽ സഞ്ജുവിനെ ടീമിൽ നിന്ന് ഒഴിവാക്കുകയാണ് ചെയ്തതെന്നും അദ്ദേഹം തന്റെ യൂട്യൂബ് ചാനലിലൂടെ തുറന്നടിച്ചു. കായികരംഗത്ത് ഇത്തരം പദപ്രയോഗങ്ങൾ പലപ്പോഴും സത്യം മറച്ചുവെക്കാനാണ് ഉപയോഗിക്കാറെന്ന് ഭോഗ്ലെ ചൂണ്ടിക്കാട്ടി.
ഇംഗ്ലണ്ടിനെതിരായ പരമ്പരയിലെ പ്രകടനത്തിന്റെ പേരില് മാത്രം ഒരു ലോകകപ്പ് ഹീറോയെ ടീമില് നിന്ന് മാറ്റിനിര്ത്തുന്നത് ശരിയല്ലെന്ന് അദ്ദേഹം വ്യക്തമാക്കി. പരിചയമില്ലാത്ത സാഹചര്യങ്ങളില് നടന്ന മൂന്ന് ഇന്നിങ്സുകള് മാത്രം അടിസ്ഥാനമാക്കി ഇത്തരമൊരു തീരുമാനം കൈക്കൊള്ളുന്നത് ടീമിലെ മറ്റ് താരങ്ങളില് അനാവശ്യമായ അരക്ഷിതാവസ്ഥ സൃഷ്ടിക്കുമെന്നും ഭോഗ്ലെ മുന്നറിയിപ്പ് നല്കി. ഒഴിവാക്കാനുള്ള യഥാർത്ഥ കാരണം സെലക്ടർമാർ വ്യക്തമാക്കണമെന്നും, അല്ലാതെ ഇല്ലാത്ത വിശ്രമം പറഞ്ഞ് യാഥാർത്ഥ്യം മൂടിവെക്കരുതെന്നും അദ്ദേഹം ആവശ്യപ്പെട്ടു.
മികച്ച താരങ്ങള്ക്ക് തുടര്ച്ചയായി പിന്തുണ നല്കുന്ന സമീപനമാണ് കഴിഞ്ഞ കുറച്ചു കാലമായി ഇന്ത്യന് ക്രിക്കറ്റ് ടീം പിന്തുടരുന്നത്. എന്നാല് സഞ്ജു സാംസണിന്റെ കാര്യത്തില് സ്വീകരിച്ച നടപടി ഈ കീഴ്വഴക്കത്തിന് വിരുദ്ധമാണെന്നും അദ്ദേഹം നിരീക്ഷിച്ചു. ഏഷ്യന് ഗെയിംസിനുള്ള ഇന്ത്യന് ടീമില് സഞ്ജു ഇടംപിടിച്ചിട്ടുണ്ടെങ്കിലും, ടി20 ടീമിലെ അദ്ദേഹത്തിന്റെ ഭാവി സംബന്ധിച്ചുള്ള ആശങ്കകള് ഇതിനോടകം തന്നെ കായികലോകത്ത് ചര്ച്ചയായി മാറിക്കഴിഞ്ഞു.
