വാഷിംഗ്ടൺ: ഇന്ത്യൻ വംശജനും മലയാളിയുമായ നാസ ബഹിരാകാശയാത്രികൻ അനിൽ മേനോൻ അന്താരാഷ്ട്ര ബഹിരാകാശ നിലയത്തിൽ (ISS) വിജയകരമായി എത്തിച്ചേർന്നു. റഷ്യയുടെ സോയൂസ് എംഎസ്-29 ബഹിരാകാശപേടകത്തിൽ മൂന്ന് മണിക്കൂറിലേറെ നീണ്ട യാത്രയ്ക്കൊടുവിൽ ഇന്ന് പുലർച്ചെ രണ്ടുമണിയോടെയാണ് അദ്ദേഹം ഉൾപ്പെട്ട സംഘം ലക്ഷ്യസ്ഥാനത്ത് എത്തിയത്. റഷ്യൻ കോസ്മനോട്ടുകളായ പ്യോത്ര് ഡുബ്രോവ്, അന്ന കികിന എന്നിവരാണ് അനിൽ മേനോന്റെ സഹയാത്രികർ.
കസാഖിസ്ഥാനിലെ ബൈക്കനൂർ കോസ്മോഡ്രോമിൽ നിന്ന് ഇന്നലെ രാത്രി 8.17-നാണ് സോയൂസ് എംഎസ്-29 വിക്ഷേപിച്ചത്. യാത്ര ആരംഭിച്ച് ഏതാനും മണിക്കൂറുകൾക്കകം രാത്രി 11.52-ഓടെ പേടകം അന്താരാഷ്ട്ര ബഹിരാകാശ നിലയത്തിലെ പ്രിച്ചാൽ മൊഡ്യൂളിൽ വിജയകരമായി ഡോക്ക് ചെയ്തു. തുടർന്ന് നിലയത്തിലേക്കുള്ള പ്രവേശന നടപടികൾക്കിടെ ചെറിയ സാങ്കേതിക തടസ്സങ്ങൾ നേരിട്ടിരുന്നു. ട്രാക്കിംഗ്, ഡാറ്റ റിലേ ഉപഗ്രഹങ്ങളുമായുള്ള ബന്ധം താൽക്കാലികമായി വിച്ഛേദിക്കപ്പെട്ടതോടെ തത്സമയ സംപ്രേഷണം അൽപസമയം തടസ്സപ്പെട്ടെങ്കിലും, സുരക്ഷാ നടപടികൾ പൂർത്തിയാക്കി സംഘം വിജയകരമായി നിലയത്തിനുള്ളിലേക്ക് പ്രവേശിച്ചതായി നാസ സ്ഥിരീകരിച്ചു.
അടുത്ത എട്ടു മാസക്കാലം അന്താരാഷ്ട്ര ബഹിരാകാശ നിലയത്തിൽ താമസിക്കുന്ന സംഘം മനുഷ്യശരീരത്തിൽ ബഹിരാകാശത്തിന്റെ ദീർഘകാല സ്വാധീനം, പുതിയ സാങ്കേതികവിദ്യകൾ, ഭൗതികശാസ്ത്രം, ജീവശാസ്ത്രം തുടങ്ങി വിവിധ മേഖലകളിലെ ശാസ്ത്രീയ പരീക്ഷണങ്ങൾക്കും ഗവേഷണങ്ങൾക്കും നേതൃത്വം നൽകും. 2027 ഏപ്രിലിൽ ദൗത്യം പൂർത്തിയാക്കി ഭൂമിയിലേക്ക് മടങ്ങാനാണ് നിലവിലെ പദ്ധതി. ഡോക്ടറും എഞ്ചിനീയറുമായ അനിൽ മേനോന്റെ ഈ നേട്ടം ഇന്ത്യൻ സമൂഹത്തിനും മലയാളികൾക്കും ഒരുപോലെ അഭിമാനകരമാണ്. ആഗോള ബഹിരാകാശ ഗവേഷണ രംഗത്ത് നിർണായകമായ സംഭാവനകൾ അർപ്പിക്കാൻ ഈ ദൗത്യത്തിലൂടെ അദ്ദേഹത്തിന് സാധിക്കുമെന്നാണ് വിലയിരുത്തപ്പെടുന്നത്.
