ന്യൂഡൽഹി: പശ്ചിമേഷ്യയിൽ അമേരിക്കയും ഇറാനും തമ്മിലുള്ള സംഘർഷം രൂക്ഷമാവുകയും ഹോർമുസ് കടലിടുക്ക് വഴിയുള്ള എണ്ണക്കപ്പൽ ഗതാഗതം ഭീഷണിയിലാകുകയും ചെയ്യുന്ന സാഹചര്യത്തിൽ, രാജ്യത്തിന്റെ ഊർജ്ജസുരക്ഷ ഉറപ്പാക്കാൻ ഇന്ത്യ നിർണ്ണായക നടപടികളുമായി മുന്നോട്ട് പോകുന്നു. കഴിഞ്ഞ 90 ദിവസത്തിനിടെ എണ്ണ ഇറക്കുമതി നയത്തിൽ വരുത്തിയ സുപ്രധാന മാറ്റങ്ങൾ ആഗോള എണ്ണവിതരണ പ്രതിസന്ധിയുടെ ആഘാതം കുറയ്ക്കാൻ ഇന്ത്യയെ സഹായിക്കുമെന്നാണ് വിലയിരുത്തൽ.
ഗൾഫ് രാജ്യങ്ങളിൽ നിന്നുള്ള ദീർഘകാല കരാറുകളെ മാത്രം ആശ്രയിച്ചിരുന്ന രീതിയിൽ നിന്ന് മാറി, ആവശ്യാനുസരണം ആഗോള വിപണിയിൽ നിന്ന് നേരിട്ട് എണ്ണ വാങ്ങുന്ന ‘സ്പോട്ട് മാർക്കറ്റ്’ സംവിധാനത്തിലേക്ക് പൊതുമേഖലാ എണ്ണക്കമ്പനികൾ ശ്രദ്ധ കേന്ദ്രീകരിച്ചിരിക്കുകയാണ്. ഇറാൻ സംഘർഷവും വിതരണത്തിലെ അനിശ്ചിതത്വവും പഴയ മാതൃകയുടെ അപകടസാധ്യതകൾ വ്യക്തമാക്കിയതോടെയാണ് ഈ തന്ത്രപരമായ മാറ്റം. ഗൾഫ് മേഖലയ്ക്ക് പുറമെ റഷ്യ, അമേരിക്ക, പടിഞ്ഞാറൻ ആഫ്രിക്ക എന്നിവിടങ്ങളിൽ നിന്നുള്ള ഇറക്കുമതി വർധിപ്പിച്ച ഇന്ത്യ, ബ്രസീൽ, ഗയാന, വെനസ്വേല തുടങ്ങിയ രാജ്യങ്ങളിൽ നിന്നുമുള്ള ലഭ്യത ഉറപ്പാക്കാനും ശ്രമിക്കുന്നുണ്ട്. ഇതിന്റെ ഭാഗമായി ഏപ്രിലിൽ വെനസ്വേലയിൽ നിന്ന് റെക്കോർഡ് അളവിൽ ക്രൂഡ് ഓയിൽ ഇറക്കുമതി ചെയ്തിരുന്നു.
റഷ്യ-യുക്രെയ്ൻ യുദ്ധസാഹചര്യത്തിൽ റഷ്യൻ എണ്ണ ശുദ്ധീകരണ കേന്ദ്രങ്ങൾക്കും കയറ്റുമതി ടെർമിനലുകൾക്കും ഏൽക്കുന്ന നാശനഷ്ടങ്ങൾ ഇന്ത്യ ആശങ്കയോടെയാണ് നിരീക്ഷിക്കുന്നത്. അതേസമയം, റഷ്യയിലെ ആഭ്യന്തര ഇന്ധനക്ഷാമം പരിഹരിക്കുന്നതിനായി ഇന്ത്യയിൽ നിന്ന് പെട്രോൾ കയറ്റുമതി ചെയ്തതായും റിപ്പോർട്ടുകളുണ്ട്. ഊർജ്ജസുരക്ഷ ശക്തിപ്പെടുത്തുന്നതിനായി വിദേശകാര്യ മന്ത്രി എസ്. ജയശങ്കർ, ദേശീയ സുരക്ഷാ ഉപദേഷ്ടാവ് അജിത് ഡോവൽ, പെട്രോളിയം മന്ത്രി ഹർദീപ് സിംഗ് പുരി എന്നിവർ വിവിധ രാജ്യങ്ങളുമായി നടത്തിയ നയതന്ത്ര ചർച്ചകളും നിർണ്ണായകമായി. ഈ നടപടികളുടെ ഫലമായി, മാർച്ചിലുണ്ടായിരുന്നതിനെ അപേക്ഷിച്ച് ആഗോള എണ്ണ പ്രതിസന്ധികളെ നേരിടാൻ ഇന്ത്യ ഇപ്പോൾ കൂടുതൽ സജ്ജമാണ്.
