മുംബൈ: ചൊവ്വാഴ്ച രാവിലെ ഇന്ത്യന് ഓഹരി വിപണി കനത്ത നഷ്ടത്തോടെയാണ് വ്യാപാരം ആരംഭിച്ചത്. മിഡില് ഈസ്റ്റില് വര്ധിച്ചുവരുന്ന ഭൗമരാഷ്ട്രീയ പിരിമുറുക്കങ്ങളും ആഗോള വിപണിയില് ക്രൂഡ് ഓയില് വിലയിലുണ്ടായ പെട്ടെന്നുള്ള കുതിച്ചുചാട്ടവും നിക്ഷേപകരുടെ ആത്മവിശ്വാസത്തെ കാര്യമായി ബാധിച്ചു. തുടക്ക വ്യാപാരത്തില് സെന്സെക്സ് ഏകദേശം 500 പോയിന്റോളം ഇടിഞ്ഞ് 77,130 നിലവാരത്തിലേക്ക് താഴ്ന്നപ്പോൾ, നിഫ്റ്റി 24,100 എന്ന സുപ്രധാന ലെവലിന് താഴേക്ക് പതിച്ച് 24,070-നടുത്ത് വ്യാപാരം തുടരുകയാണ്. ഭൂരിഭാഗം ഓഹരികളും നഷ്ടത്തിലായതോടെ വിപണി കനത്ത വില്പന സമ്മർദ്ദത്തിന് സാക്ഷ്യം വഹിക്കുകയാണ്.
പശ്ചിമേഷ്യയിലെ സംഘർഷം കൂടുതൽ സങ്കീർണ്ണമായതാണ് വിപണിയെ സ്വാധീനിക്കുന്ന പ്രധാന നെഗറ്റീവ് ഘടകം. യുഎസ്-ഇറാൻ തർക്കങ്ങൾ മുറുകുകയും ഇറാൻ ഷിപ്പിംഗ് മേഖലയിൽ കൂടുതൽ കർശനമായ ഉപരോധങ്ങൾ ഏർപ്പെടുത്തുകയും ചെയ്തതോടെ കപ്പൽ ഗതാഗതത്തെ ബാധിക്കുമെന്ന ആശങ്ക നിക്ഷേപകർക്കിടയിലുണ്ട്. ഇതിനുപുറമെ, ബ്രെന്റ് ക്രൂഡ് ഓയിൽ വില ബാരലിന് 85 ഡോളറിലേക്ക് കുതിച്ചുയർന്നത് ഇന്ത്യയെപ്പോലുള്ള ഇറക്കുമതി രാജ്യങ്ങൾക്ക് തിരിച്ചടിയായി. ഉയർന്ന എണ്ണവില രാജ്യത്തെ നാണയപ്പെരുപ്പം വർദ്ധിപ്പിക്കാനും വ്യാപാര കമ്മി കൂട്ടാനും കാരണമാകുമെന്ന ആശങ്കയും വിപണിയിൽ പ്രതിഫലിക്കുന്നുണ്ട്. ഇന്ത്യ വിക്സ് (India VIX) 3 ശതമാനത്തോളം ഉയർന്ന് 14-ലേക്ക് എത്തിയത് വിപണിയിലെ അസ്ഥിരത വർധിച്ചുവരുന്നതിന്റെ സൂചനയാണ്.
ബാങ്കിംഗ്, ഫിനാൻഷ്യൽ, ഓട്ടോമൊബൈൽ, റിയൽറ്റി, ഓയിൽ ആൻഡ് ഗ്യാസ് മേഖലകൾ വലിയ വില്പന സമ്മർദ്ദത്തിലാണ്. എന്നാൽ വിപണിയിലെ പൊതുവായ തകർച്ചയ്ക്കിടയിലും ഡിഫൻസീവ് ബയിംഗിന്റെ പിൻബലത്തിൽ മെറ്റൽ, ഫാർമ മേഖലകൾ മാത്രമാണ് നേരിയ പ്രതിരോധം പ്രകടിപ്പിക്കുന്നത്. സാങ്കേതികമായി നിഫ്റ്റി 50 സൂചിക നിലവിൽ ഒരു സിമെട്രിക്കൽ ട്രയാംഗിൾ പാറ്റേണിനുള്ളിലാണ് വ്യാപാരം നടത്തുന്നത്. 24,080-24,100 സപ്പോർട്ട് മേഖലയിൽ ബയർമാർ പ്രതിരോധം തീർക്കുന്നുണ്ടെങ്കിലും, 24,180-24,200 മേഖലയിലെ ശക്തമായ തടസ്സം മറികടന്നാൽ മാത്രമേ വിപണിയിൽ തിരിച്ചുരവ് സാധ്യമാകൂ. വരുമാന വളർച്ചാ ലക്ഷ്യം ഉയർത്താത്തതിനെത്തുടർന്ന് മികച്ച ഫലം പുറത്തുവിട്ടിട്ടും എച്ച്സിഎൽ ടെക്നോളജീസ് ഓഹരികൾ കനത്ത ഇടിവ് നേരിട്ടതും ഇന്നത്തെ വ്യാപാരത്തിലെ പ്രത്യേകതയാണ്.
