അറ്റ്ലാന്റ: ലോകകപ്പ് പ്രീക്വാർട്ടർ മത്സരത്തിൽ അർജന്റീനയോട് 3-2 എന്ന സ്കോറിന് തോറ്റതിന് പിന്നാലെ, റഫറിയിങ്ങിനെയും വീഡിയോ അസിസ്റ്റന്റ് റഫറി (VAR) തീരുമാനങ്ങളെയും രൂക്ഷമായി വിമർശിച്ച് ഈജിപ്ത് പരിശീലകൻ ഹൊസം ഹസൻ. മത്സരത്തിൽ തങ്ങൾക്കെതിരെ പക്ഷപാതപരമായ തീരുമാനങ്ങളുണ്ടായെന്നും, അർജന്റീനയ്ക്ക് അനുകൂലമായി കാര്യങ്ങൾ നീങ്ങിയെന്നും അദ്ദേഹം ആരോപിച്ചു. ഫിഫയുടെ തീരുമാനങ്ങളിൽ അതൃപ്തി പ്രകടിപ്പിച്ച ഹസൻ, ഇനി ലോകകപ്പ് മത്സരങ്ങൾ കാണില്ലെന്ന കടുത്ത നിലപാടും വ്യക്തമാക്കി.
അറ്റ്ലാന്റയിൽ നടന്ന ആവേശകരമായ പ്രീക്വാർട്ടർ പോരാട്ടത്തിന്റെ തുടക്കത്തിൽ 2-0 എന്ന നിലയിൽ ഈജിപ്ത് മുന്നിലായിരുന്നു. എന്നാൽ പിന്നീട് അർജന്റീന തിരിച്ചുവരികയും ഈജിപ്ത് പരാജയപ്പെടുകയുമായിരുന്നു. മത്സരത്തിൽ ഈജിപ്ത് നേടിയ രണ്ടാമത്തെ ഗോൾ വാർ പരിശോധനയിലൂടെ റദ്ദാക്കിയത് നിർണായക വഴിത്തിരിവായി. ഗോളിലേക്ക് നയിച്ച നീക്കത്തിന്റെ തുടക്കത്തിൽ അർജന്റീനൻ പ്രതിരോധ താരം ലിസാൻഡ്രോ മാർട്ടിനെസിനെതിരെ ഫൗൾ നടന്നുവെന്ന റഫറിയുടെ വിലയിരുത്തലാണ് ഗോൾ നിഷേധിക്കാൻ കാരണമായത്. മത്സരശേഷം നടന്ന വാർത്താസമ്മേളനത്തിൽ, തങ്ങൾക്ക് ലഭിക്കേണ്ടിയിരുന്ന പെനാൽറ്റികൾ അനുവദിച്ചില്ലെന്നും അദ്ദേഹം കുറ്റപ്പെടുത്തി.
അർജന്റീനൻ താരങ്ങളുടെ സമ്മർദം റഫറിയുടെ തീരുമാനങ്ങളെ സ്വാധീനിച്ചുവെന്ന് ഹസൻ ആരോപിച്ചു. നിലവിലെ ചാമ്പ്യൻമാരായ അർജന്റീനയെയും സൂപ്പർതാരം ലയണൽ മെസ്സിയെയും ടൂർണമെന്റിൽ നിലനിർത്താൻ ബോധപൂർവമായ ശ്രമങ്ങൾ നടന്നുവെന്ന സംശയവും അദ്ദേഹം പങ്കുവെച്ചു. ഈജിപ്ത് താരം സിക്കോയും റഫറിയുടെ തീരുമാനങ്ങൾ തോൽവിക്ക് കാരണമായെന്ന് അഭിപ്രായപ്പെട്ടു. സോഷ്യൽ മീഡിയയിൽ മത്സരം ഒത്തുകളി നടന്നതാണെന്ന പ്രചാരണം ശക്തമാണെങ്കിലും, ഔദ്യോഗികമായി അത്തരം ആരോപണങ്ങൾ തെളിയിക്കപ്പെട്ടിട്ടില്ല. മത്സരത്തിലെ വാർ തീരുമാനങ്ങൾ ആരാധകർക്കിടയിലും വലിയ പ്രതിഷേധത്തിന് കാരണമായിട്ടുണ്ട്.
