കൊച്ചി: സംവിധായകൻ ജിസ് ജോയിയും നടൻ ആസിഫ് അലിയും വീണ്ടും ഒന്നിക്കുന്ന ‘കോട്ടയം ബെൽറ്റ്’ എന്ന പുതിയ ചിത്രത്തിന്റെ ചിത്രീകരണം ആരംഭിച്ചു. ഡ്രീം കാച്ചർ പ്രൊഡക്ഷൻസും കൈലാഷ് പ്രൊഡക്ഷൻസും ചേർന്ന് നിർമ്മിക്കുന്ന ഈ ചിത്രം ശക്തമായ കുടുംബ പശ്ചാത്തലത്തിൽ ഒരുക്കുന്ന ഒരു ഫാമിലി ത്രില്ലറാണ്.
ഉറച്ച മനസ്സും സ്വാധീനവുമുള്ള പ്രബലമായ ഒരു കുടുംബത്തിലെ നാല് സഹോദരങ്ങളുടെ ജീവിതമാണ് ചിത്രത്തിന്റെ പ്രമേയം. കിഴക്കൻ മലയോര ഗ്രാമത്തിന്റെ പശ്ചാത്തലത്തിൽ കഥ വികസിക്കുന്ന ചിത്രം, തുടക്കം മുതൽ ഒടുക്കം വരെ ഉദ്വേഗം നിലനിർത്തുന്ന റിയലിസ്റ്റിക് അവതരണമായിരിക്കുമെന്ന് അണിയറ പ്രവർത്തകർ അറിയിച്ചു. തൃശൂരിൽ നടന്ന ചടങ്ങിൽ സാഹിത്യകാരൻ സന്തോഷ് ഏച്ചിക്കാനം സ്വിച്ചോൺ കർമ്മം നിർവഹിച്ചു. ആസിഫ് അലിയുടെ മക്കളായ ആദം അലിയും ഹയയുമാണ് ഫസ്റ്റ് ക്ലാപ്പ് നൽകിയത്. ഇതിനു മുൻപ് കൊച്ചിയിൽ നടന്ന ചടങ്ങിലായിരുന്നു ചിത്രത്തിന്റെ ടൈറ്റിൽ പ്രകാശനം.
ജിസ് ജോയിയും ആസിഫ് അലിയും ഒന്നിക്കുന്ന ആറാമത്തെ ചിത്രമെന്ന പ്രത്യേകത കൂടി ‘കോട്ടയം ബെൽറ്റി’നുണ്ട്. വിജയരാഘവൻ, ഷൈൻ ടോം ചാക്കോ, ജഗദീഷ്, അശോകൻ, ശ്രുതി രാമചന്ദ്രൻ, അലൻസിയർ, ഫർഹാൻ ഫാസിൽ, വിഷ്ണു അഗസ്ത്യ, ശ്രീകാന്ത് മുരളി, വിനീത്, ജിനു ജോസഫ്, പ്രേം പ്രകാശ്, സാന്ദ്ര ചന്ദ്രൻ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. സുരേഷ് ഗോപാലിന്റേതാണ് ചിത്രത്തിന്റെ കഥയും തിരക്കഥയും. ഗോവിന്ദ് വസന്ത സംഗീതം നിർവഹിക്കുന്ന ചിത്രത്തിന്റെ ഛായാഗ്രഹണം ബിനേന്ദ്ര മേനോനും എഡിറ്റിംഗ് സൂരജ് ഇ.എസും നിർവഹിക്കുന്നു. ഇടുക്കി, കൊച്ചി, തൃശൂർ എന്നിവിടങ്ങളിലായി ചിത്രീകരണം പൂർത്തിയാകുന്ന ചിത്രം കുടുംബബന്ധങ്ങളും അധികാരപ്പോരാട്ടവും ത്രില്ലറിന്റെ ചടുലതയോടെയാണ് പ്രേക്ഷകർക്ക് മുന്നിലെത്തിക്കുന്നത്.
