വാഷിംഗ്ടൺ: ഹോർമുസ് കടലിടുക്ക് വഴി കടന്നുപോകുന്ന ചരക്കുകൾക്ക് 20 ശതമാനം ഫീസ് ഈടാക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ അപ്രതീക്ഷിത പ്രഖ്യാപനം ആഗോള ഷിപ്പിംഗ് മേഖലയിൽ കടുത്ത ആശയക്കുഴപ്പം സൃഷ്ടിക്കുന്നു. ലോകത്തെ എണ്ണ-വാതക വിതരണത്തിന്റെ അഞ്ചിലൊന്ന് കടന്നുപോകുന്ന ഈ നിർണ്ണായക ജലപാതയുടെ കാവൽക്കാരൻ യുഎസ് ആയിരിക്കുമെന്നും, സുരക്ഷാ സേവനത്തിന് പകരമായി കയറ്റുമതി ചെയ്യുന്ന ചരക്കുകളുടെ വലിയൊരു വിഹിതം തങ്ങൾക്ക് വേണമെന്നുമാണ് ട്രംപിന്റെ ആവശ്യം. എന്നാൽ, സൂപ്പർടാങ്കറുകൾക്ക് ദശലക്ഷക്കണക്കിന് ഡോളറിന്റെ അധിക ബാധ്യത വരുത്തിവെക്കുന്ന ഈ ഭീമമായ തുക കപ്പൽ വ്യവസായ രംഗത്തെ അമ്പരപ്പിച്ചിരിക്കുകയാണ്.
വിഷയത്തിൽ വൈറ്റ് ഹൗസ് ആവശ്യത്തിന് വിശദാംശങ്ങൾ നൽകാത്തതും സഖ്യകക്ഷികളെ മുൻകൂട്ടി അറിയിക്കാത്തതും ഈ നീക്കത്തെ കൂടുതൽ ദുരൂഹമാക്കുന്നു. നിലവിൽ അന്താരാഷ്ട്ര വിപണിയിൽ എണ്ണവില ബാരലിന് 84 ഡോളറോളമാണ്; അതുകൊണ്ടുതന്നെ രണ്ട് ദശലക്ഷം ബാരൽ ക്രൂഡ് ഓയിൽ വഹിക്കുന്ന ഒരു സൂപ്പർടാങ്കറിന് ട്രംപിന്റെ 20 ശതമാനം ഫീസ് പ്രകാരം ഏകദേശം 30 മില്യൺ ഡോളറിലധികം നൽകേണ്ടിവരും. ഇത് തികച്ചും അന്യായമാണെന്ന് വിലയിരുത്തുന്ന ഷിപ്പിംഗ് ക്യാപ്റ്റൻമാർ ഈ നീക്കത്തെ പാതയോരത്തെ പകൽകൊള്ള എന്നാണ് വിശേഷിപ്പിച്ചത്. മുൻകൂട്ടി യാതൊരു മുന്നറിയിപ്പും നൽകാതെ പ്രഖ്യാപിച്ച ഈ ഫീസ് സംവിധാനം കപ്പൽ ഗതാഗതത്തെ എങ്ങനെ ബാധിക്കുമെന്ന കാര്യത്തിൽ വലിയ അനിശ്ചിതത്വമാണ് നിലനിൽക്കുന്നത്.
മേഖലയിലെ സുരക്ഷ ഉറപ്പാക്കുന്ന കക്ഷികൾക്ക് പ്രതിഫലം ലഭിക്കണമെന്ന തത്വത്തെ അനുകൂലിച്ച് ഇറാൻ വിദേശകാര്യ മന്ത്രി അബ്ബാസ് അരഗ്ചി രംഗത്തെത്തിയെങ്കിലും, ട്രംപ് ആവശ്യപ്പെട്ട 20 ശതമാനം എന്ന നിരക്ക് അമിതമാണെന്നും ഇത് അംഗീകരിക്കാനാവില്ലെന്നും വ്യക്തമാക്കി. മുൻപ് ഈ റൂട്ടിൽ ഒരു യാത്രയ്ക്ക് താൽക്കാലികമായി ഇറാൻ 2 ദശലക്ഷം ഡോളർ വരെ ഈടാക്കിയിരുന്ന സ്ഥാനത്താണ് ട്രംപ് ഇപ്പോൾ ഭീമമായ തുക ആവശ്യപ്പെടുന്നത്. ഇറാന് മേലുള്ള യുഎസ് ഉപരോധം കടുപ്പിക്കുന്നതിനൊപ്പം പുതിയ ഫീസ് കൂടി പ്രഖ്യാപിച്ചതോടെ, വെടിനിർത്തൽ തകർന്ന പശ്ചാത്തലത്തിൽ ഹോർമുസ് കടലിടുക്കിലെ യുഎസ്-ഇറാൻ പോരാട്ടം പുതിയൊരു തലത്തിലേക്ക് കടക്കുകയാണ്.
ഈ അനിശ്ചിതാവസ്ഥ ഇന്ത്യയുടെ ഊർജ്ജ സുരക്ഷയ്ക്ക് വലിയ വെല്ലുവിളിയാണ് ഉയർത്തുന്നത്. ക്രൂഡ് ഓയിൽ, എൽപിജി, എൽഎൻജി എന്നിവയുടെ ഇറക്കുമതിക്കായി ഹോർമുസ് കടലിടുക്കിനെ വലിയ തോതിൽ ആശ്രയിക്കുന്ന രാജ്യമാണ് ഇന്ത്യ എന്നതിനാൽ, അന്താരാഷ്ട്ര വിപണിയിൽ ഉണ്ടാകുന്ന എണ്ണവില വർദ്ധനവ് രാജ്യത്തിന്റെ ഇറക്കുമതി ബില്ലിനെയും പണപ്പെരുപ്പത്തെയും ദോഷകരമായി ബാധിച്ചേക്കാം. ഇതിനുപുറമെ, കപ്പലുകളുടെ ഇൻഷുറൻസ് നിരക്കുകളിലും ഫ്രൈറ്റ് ചാർജുകളിലും ഉണ്ടാകുന്ന വർദ്ധനവും ഇന്ത്യക്ക് സാമ്പത്തിക സമ്മർദ്ദമുണ്ടാക്കും. എങ്കിലും, സമീപകാലത്തായി റഷ്യ ഉൾപ്പെടെയുള്ള രാജ്യങ്ങളിൽ നിന്ന് എണ്ണ ഇറക്കുമതി നടത്തിയും വിതരണ ശൃംഖലയിൽ വൈവിധ്യം കൊണ്ടുവന്നും ഈ പ്രതിസന്ധിയെ നേരിടാൻ ഇന്ത്യ ഒരു പരിധിവരെ സജ്ജമായിട്ടുണ്ട് എന്നത് ആശ്വാസകരമാണ്.
